Дар як сатр
» » Мулоқоти Раиси вилоят бо сокинони ноҳияи Ёвон

Мулоқоти Раиси вилоят бо сокинони ноҳияи Ёвон

30-10-2017, 14:43

Мулоқоти Раиси вилоят бо сокинони ноҳияи Ёвон

Ҳафтаи сипаригашта дар кохи фарҳанги ба номи Тағоймурод Хушвахтови ноҳияи Ёвон мулоқоти раиси вилояти Хатлон, узви Маҷлиси миллии Маҷлиси Олии Ҷумҳурии Тоҷикистон Давлатшоҳ Гулмаҳмадзода бо сокинони ноҳия баргузор гардид. Ҳадаф аз мулоқоти мазкур, пеш аз ҳама, шунидани арзу матлаби шаҳрвандони ноҳия ва мулоқот бо онҳо буд.

Дар ибтидо раиси вилоят намунаи маҳсулоти истеҳсолнамудаи саноатчиёни ноҳия, аз қабили сару либоси мактабӣ, ҳунарҳои миллӣ, нассоҷӣ, таббоҳҳӣ, дӯзандагӣ, бофандагӣ, маҳсули дастони кадбонуҳои боҳунари ёвонӣ-нону кулчаҳои равғанӣ, хӯрокҳои миллӣ, ки ба маъраз гузошта шуда буд, дидан кард.

Зимни мулоқот раиси вилоят Давлатшоҳ Гулмаҳмадзода иброз дошт, ки арзу шикоятҳои ҳангоми мулоқот бо сокинони навоҳии гуногун баён гардида, нисбати солиёни қаблӣ ба куллӣ фарқ дорад. Аз мулоқот бо шаҳрвандон баръало равшан мегардад, ки сокинони шаҳру ноҳияҳо агар солиёни пеш бештар ба масоили иҷтимоӣ муроҷиат мекарданд, алҳол бошад, муроҷиати онҳо атрофи ҳалли масъалаҳои иқтисодӣ, таъсиси корхонаҳо, саҳмгузорӣ дар корҳои ободонӣ нигаронида шудааст. Аз ин равшан мегардад, ки тайи 26-соли соҳибистиқлолии Ҷумҳурии Тоҷикистон рӯзгори аҳолӣ рӯз ба рӯз беҳ гардида, сатҳи камбизоатӣ коҳиш ёфтааст. Роҳбари вилоят ҳамчунин ироа дошт, ки тӯли соҳибистиқлолӣ агар нафаре тавонист фарзанди хешро дар рӯҳияи инсондӯстӣ, заҳматпарастӣ, бунёдкорӣ тарбия созад. Ин фарзандон, ҳам дар ҷомеа ва ҳам барои волидайн амсоли аз нек боғ буда, бо заҳмату талошҳояшон дар пешрафти соҳаҳои гуногун саҳм гузоштаанд.

Раиси вилоят, аз ҷумла таъкид дошт, ки Ёвон низ аз ҷумлаи ноҳияҳоест, ки фарзандони содиқро тарбият намуда, онҳо дар рушди иқтисодии кишвар саҳми муносиб гузошта истодаанд. Ҳамин тавр, раиси вилоят ба шунидани арзу матлаби сокинони ноҳияи Ёвон шурӯъ намуд. Сараввал, Шамсулло Тилабов, сокини Ҷамоати деҳоти “Ҳасан Ҳусейнов”-и ноҳияи Ёвон оид ба таъмирталаб будани роҳҳои мошингард изҳорӣ андеша намуд. Мория Мусулмонова, сокини Ҷамоати шаҳраки Ёвон доир ба масъалаи вобаста ба дастрасии оби нӯшокӣ барои сокинони хонаҳои баландошёна арзи дил намуд. Тавре ки равшан гардид, корҳои бо оби нӯшокӣ таъмин намудани биноҳои баландошёнаи маркази ноҳия аз ҷониби лоиҳаи бонки аврупоии “Таҷдид ва рушд” ба маблағи 5,8 миллион доллари амрикоӣ аз моҳи августи соли 2015 оғоз ёфта, бояд то охири соли 2018 ба анҷом расонида шавад. Ҳамин тавр, Ашӯрова Нигина аз ободкориҳои вилояту ҷумҳурӣ ва ноҳия тайи солҳои соҳибистиқлолӣ ба роҳбарияти Ҳукумати кишвар изҳори миннатдорӣ намуда, арза дошт ки сокинони ноҳияи Ёвон ба боғи фарҳангию истироҳатии замонавӣ ниёз доранд.

Қутбиддин Сафархолов, раиси собиқадорони ҷангу заҳмат, аз раиси вилоят миннатдорӣ намуд, ки пайваста бо аҳолӣ мулоқоту вохӯриҳо доир намуда, арзу матлаби онҳоро мешунавад ва баҳри ҳаллу фаслаш тадбирҳои мушаххас меандешанд. Раиси собиқадорон ҳамчунин иброз дошт, ки дар ноҳия 10 ташкилоти ибтидоии собиқадорони арсаи ҷангу меҳнат фаъолият доранд. Аъзоёни ташкилотҳои мазкур бо аҳолӣ, бахусус ҷавонон, пайваста вохӯриҳо гузаронида, доир ба пешгирии шомилшавии ҷавонон ба ҳаракатҳои экстремистию террористӣ ва ҳизбҳои фаъолияташон дар ҷумҳурӣ мамнӯъ суҳбатҳо баргузор менамоянд. Номбурда ҳамчунин аз вазъи роҳҳои марказии ноҳия ва кӯпруке, ки дар натиҷаи боришоти зиёд валангор гардидааст , ба раиси вилоят арзи матлаб намуд.
Тавре ки равшан гардид, пули мазкур соли 2014 бинобар сабаби боришот ва омадани сел пурра хароб гардидааст. Меҳринисо Сатторова, сокинони Ҷамоати шаҳраки Ёвон оид ба дастрас набудани мавҷи шабакаи телевизиони Хатлон дар ҳудуди ноҳия арзи дил намуд.

Мулоқоти Раиси вилоят бо сокинони ноҳияи Ёвон

Роҳбари вилоят пас аз шунидани муроҷиати шаҳрвандон дар ноҳияи Ёвон баҳри ислоҳи камбудиҳои ҷойдошта, ҳаллу фасли мушкилот дастуру маслиҳатҳои муфид дод. Сипас, Давлатшоҳ Гулмаҳмадзода аз масъулини соҳаҳои иқтисодӣ, кишоварзӣ, саноат, бахши сармоягузорӣ доир ба камбудиҳои ҷойдошта пурсиш ба амал оварда, баҳри ҳаллу фасли онҳо низ дастур дод.

Давлатшоҳ Гулмаҳмадзода зимни мулоқот бо фаъолони ноҳия ва шаҳрвандон доир ба Паёми Роҳбари давлат, ки ҳамчун ҳуҷҷати раҳнамосоз барои рушду нумуи Тоҷикистони азиз нигаронида шудааст, ибрози андеша намуда, таъкид дошт, ки дар понздаҳ соли охир даромади буҷети давлатӣ аз 300 миллион сомонӣ ба 18 миллиард сомонӣ зиёд гардида, даромади аҳолӣ бошад 25 баробар ва пасандозҳо беш аз 85 баробар афзун гардиданд. - Дар даврони соҳибистиқлолӣ аз ҳамаи сарчашмаҳо, аз ҷумла аз ҳисоби лоиҳаҳои афзалиятнок барои рушди соҳаҳои энергетика, саноат, сохтмон, алоқа, инфрасохтор, маорифу тандурустӣ ва дигар бахшҳои иҷтимоӣ 88 миллиард сомонӣ равона гардид,-таъкид дошт раиси вилоят.

Ҳамчунин, зикр гардид, ки дар самти таъмини истиқлолияти энергетикӣ бо маблағгузорӣ бо 36 миллиард сомонӣ иншооти хурду бузурги муҳимро оид ба истеҳсолу интиқоли барқ сохта ба истифода дода шудааст. Ҳамчунин, дар замони истиқлолият беш аз 2000 км роҳи мошингард, 190 км роҳи оҳан ва зиёда аз 30 км нақбҳои мошингузар ба маблағи умумии 11,4 миллиард сомонӣ мавриди истифода қарор дода шудаанд. Натиҷаи ин аст, ки давлати мо ба яке аз ҳадафҳои стратегӣ раҳоӣ аз бунбасти коммуникатсионӣ ҷиҳати таъмини рафтуомади доимии нақлиёти мусофиркашу боркаш байни минтақаҳои гуногуни кишварамон ва давлатҳои ҳамсоя ноил шуда, қаламрави се порчаи Тоҷикистон танҳо дар замони истиқлолият ба як кишвари воҳид табдил ёфт.

Ҳамин тавр Давлатшоҳ Гулмаҳмадзода доир ба самтҳои асосии Паёми Роҳбари давлат сухан намуда, таъкид дошт, ки тибқи барномаи рушди боғу токпарварӣ майдони боғу токпарварии мамлакат ба 180 ҳазор гектар расонида шуд, ки дар қиёс ба соли 1991-ум ду баробар зиёд буда, дар ҳифзи амнияти озуқувории кишвар, рушди содирот ва таъмини саноати коркард бо ашёи хом нақши арзишманд гузошт. Раиси вилоят, ҳамчунин, доир ба бунёди муассисаҳои маориф ва тандурустӣ изҳори андеша намуда, таъкид дошт, ки фақат соли 2016 аз ҳисоби ҳамаи сарчашмаҳо 201 бинои таълимӣ ба маблағи 540 миллион сомонӣ бунёд ва азнавсозӣ гардида, 39 ҳазор ҷойи нишаст муҳайё карда шудааст.

Ҳамин тавр, Давлатшоҳ Гулмаҳмадзода зимни мулоқот бо сокинони ноҳияи Ёвон бобати масоили доғи рӯзи ҷомеа-шомилшавии ҷавонон ба ҳизбу ҳаракатҳои террористию экстремистӣ низ таъкид ба миён оварда, ироа дошт, ки фарзандонро бояд дар рӯҳияи ватандӯстӣ, инсондӯстӣ, бунёдкорию созандагӣ тарбия намуда, волидайн ва аҳли ҷомеаи шаҳрвандӣ баҳри пешгирии ҳодисаҳои номатлуб-шомилшавии ҷавонон ба ҳизбу ҳаракатҳои мамнӯъ бояд тадбирҳои мушаххас андешанд. Танҳо дар он сурат мо метавонем, ба ҳадафҳои олии Ҳукумати кишвар, Президенти мамлакат, Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон, ки таъмини шароит барои зиндагии арзандаи сокинони кишвар аст, ноил гардем.

ВАХШОНА,
“Хатлон”



Шарҳи хонандагон +

Матолиби дигар:

Давлатшоҳ ГУЛМАҲМАДЗОДА: «Ҳадафи Пешвои миллат таъмини зиндагии шоистаи мар ...

Давлатшоҳ ГУЛМАҲМАДЗОДА: «Ҳадафи Пешвои миллат таъмини зиндагии шоистаи мар ...

Хабарҳо, Ҳокимияти давлатӣ
Рӯ ба рӯ бо мардум

Рӯ ба рӯ бо мардум

Хабарҳо, Ҳокимияти давлатӣ, Ҳаёти иҷтимоӣ, ҒАЙБУЛЛО ҲАЛИМОВ
Қабули шаҳрвандон дар ноҳияи Панҷ

Қабули шаҳрвандон дар ноҳияи Панҷ

Хабарҳо, Ҳокимияти давлатӣ, Ҳаёти иҷтимоӣ, АСАЛМО САФАРОВА
Д. Гулмаҳмадзода: “Қарздиҳӣ аз ҷониби бонкҳо коҳиш ёфтааст”

Д. Гулмаҳмадзода: “Қарздиҳӣ аз ҷониби бонкҳо коҳиш ёфтааст”

Хабарҳо, Ҳокимияти давлатӣ, Ҳаёти иҷтимоӣ
Д. Гулмаҳмадзода: «Бо ҷалби соҳибкорон корхонаҳои саноатӣ бунёд намуда, ҷой ...

Д. Гулмаҳмадзода: «Бо ҷалби соҳибкорон корхонаҳои саноатӣ бунёд намуда, ҷой ...

Хабарҳо, Ҳокимияти давлатӣ, АСАЛМО САФАРОВА