Дар як сатр
» » Д. Гулмаҳмадзода: «Қонун ба рӯзгори мардум беҳбудӣ овард»

Д. Гулмаҳмадзода: «Қонун ба рӯзгори мардум беҳбудӣ овард»

3-10-2017, 08:54

Д. Гулмаҳмадзода: «Қонун ба рӯзгори мардум беҳбудӣ овард»


Рӯзи 28 сентябри соли 2017 дар маҷлисгоҳи мақомоти иҷроияи ҳокимияти давлатии вилояти Хатлон Иҷлосияи ёздаҳуми Маҷлиси вакилони халқи вилояти Хатлон, даъвати панҷум баргузор гардид.

Иҷлосияро раиси Маҷлиси вакилони халқи вилоят Давлатшоҳ Гулмаҳмадзода ҳусни оғоз бахшида, иброз дошт, ки дар Иҷлосия муовини аввали раиси вилоят, муовинон, муовини роҳбари дастгоҳи раиси вилоят, роҳбарони ташкилоту муассисаҳои вилоятӣ, сардорони мақомоти ҳифзи ҳуқуқ, мудирони бахшҳои танзими анъана ва ҷашну маросимҳо дар Ҷумҳурии Тоҷикистон дар шаҳру навоҳӣ, сардорони идораҳои беҳдошти замин, мақомоти андоз, раисони ҷамоатҳои деҳот, имомхатибони шаҳру ноҳия ва кормандони васоити ахбори омма ширкат доранд. Сипас вакилон рӯзномаи иҷлосияро тасдиқ намуданд. Рӯзномаи иҷлосияи ёздаҳуми Маҷлиси вакилони халқи вилояти Хатлон, даъвати панҷум масъалаҳои зеринро дар бар гирифт:

1. Ахбороти Комиссияи вилоятии интихобот оид ба гузаронидани интихоботи вакили Маҷлиси вакилони халқи вилояти Хатлон ба ивази вакилони хориҷшуда дар ҳавзаҳои интихоботии Қӯрғонтеппа №3, Сарбанд №11, Носири Хусрав №13, Шаҳритуз №67 ва тасдиқ намудани ваколати вакилони Маҷлиси вакилони халқи вилояти Хатлон, даъвати панҷум.
2. Рафти иҷрои Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» аз 8 июни соли 2007, №272 дар шаҳру ноҳияҳои вилоят.

3. Рафти иҷрои қарори раиси вилояти Хатлон аз 2 ноябри соли 2012, №263 оид ба қарори Ҳукумати Ҷумҳурии Тоҷикистон аз 31 августи соли 2012, №450 «Дар бораи Барномаи давлатии азхудкунии заминҳои нави обёришаванда ва барқарорсозии заминҳои аз гардиши кишоварзӣ берунмонда дар Ҷумҳурии Тоҷикистон барои солҳои 2012-2020» ва беҳтар намудани ҳолати мелиоративии заминҳои кишоварзӣ дар шаҳру ноҳияҳои вилоят.

4. Ҳисоботи сардори Раёсати андози вилоят оид ба иҷрои талаботҳои Кодекси андози Ҷумҳурии Тоҷикистон.

5. Масъалаҳои ҷорӣ.

Сараввал вакилон ахбороти раиси комиссияи интихоботӣ Қурбон Қурбоновро оид ба гузаронидани интихоботи вакили Маҷлиси вакилони халқи вилояти Хатлон ба ивази вакилони хориҷшуда дар ҳавзаи интихоботии Қӯрғонтеппа №3, Самизода Санавбар Зайнулло аз ҳавзаи интихоботии Сарбанд №11, Садриддинзода Нуриддин Талбак аз ҳавзаи интихоботии Носири Хусрав №13 ва Оймаҳмадзода Рамазон Алихонро аз ҳавзаи интихоботии Шаритуз №67 шунида тасдиқ намуданд.

Аз рӯйи масъалаи дуюми рӯзномаи Иҷлосия рафти иҷрои Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» аз 8 июни соли 2007, №272 дар шаҳру ноҳияҳо муовини раиси вилоят Хидирзода Махфират Умар ҳисоботи муфассал дод:

Муҳтарам вакилони халқ !

Ҳозирини гиромӣ !


Иҷлосияи мо дар рӯзҳое баргузор гардида истодааст, ки сокинони вилоят якҷоя бо мардуми шарифу сарбаланди кишвар 10-солагии қабули Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» ва «26-солагии Истиқлолияти давлатии Тоҷикистон»-ро бо шукӯҳу шаҳомат ҷашн гирифт ва сафарҳои кории Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар як қатор шаҳру ноҳияҳои вилоят анҷом ёфт, ки аҳолӣ зери таассуроти ин чорабиниҳо ва дастуру ҳидоятҳои Пешвои миллат кору зиндагӣ доранд.

Хушбахтона, вазъи сиёсӣ, иҷтимоӣ, иқтисодӣ ва фарҳангии кишвар сол аз сол беҳтар гардида, сиёсати дурусти иқтисодию иҷтимоии Ҳукумати Ҷумҳурии Тоҷикистон натиҷаҳои мусбатро ба бор оварда истодааст.

Д. Гулмаҳмадзода: «Қонун ба рӯзгори мардум беҳбудӣ овард»

Ташаббусҳои шоистаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон боиси рушди кишвар гардида, дар таъмини Истиқлолияти давлатии Тоҷикистон нақши муҳим дорад.

Ба хотири суботи кишвар, таҳкими пояҳои давлатдорӣ ва амнияти томи шаҳрвандон Президенти мамлакат якчанд ибтикори шоистаро дар ҷумҳурӣ роҳандозӣ намуд, ки аз тарафи ҷомеа хуб пазируфта шуданд. Ин ташаббусҳои Сарвари давлат ҷанбаи баланди инсонгароӣ дошта, барои ба эътидол овардани ҷомеа, ҳалли мушкилоти ҷойдошта ва ба низом даровардани фаъолияти иҷтимоӣ ва сиёсӣ мусоидат менамоянд.

Бо ташаббуси худ Президенти мамлакат Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон»-ро пешниҳод намуд, ки дар шароити кунунӣ таҷрибаи нодир ва ҳаётан муҳим ба ҳисоб мерафт. Ин санади тақдирсоз дар ҳақиқат маҳсули мушоҳида ва таҳлилҳои чандинсолаи Президенти мамлакат буда, барои ба танзим даровардани ҷашну маъракаҳо дар ҷумҳурӣ кумаки бевосита намуд ва ба баланд бардоштани сатҳи зиндагии мардуми ниёзманду камбизоат мусоидат намуд. Дар давоми даҳ соли амали Қонун дар ҳаёти иҷтимоии аҳолӣ дигаргунӣ, пешрафт ва таҳаввулоти ҷиддӣ ба амал омаданд.

Рафти иҷрои Қонуни Ҷумҳу-рии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон», ки дар иҷлосияи имрӯза мавриди баррасӣ қарор дода истодаем, бевосита ба фаъолияту зиндагии ҳар як сокини вилоят, новобаста аз касбу кор, аз ҷумла баҳри беҳтаршавии вазъи зиндагӣ ва паст кардани сатҳи камбизоатӣ дахл дорад.

Бояд тазаккур дод, ки санади мазкур дар ҷодаи қонунэҷодкунии кишвар таҷрибаи нахустин буда, мушкилиҳо ва гуногунандешиҳо дар бобати қабули Қонуни мазкур зиёд буданд.

Д. Гулмаҳмадзода: «Қонун ба рӯзгори мардум беҳбудӣ овард»

Ҳадаф аз таҳия ва қабули Қонун ба низом даровардани маъракаю маросимҳо маҳсуб ёфта, таҳлилҳо нишон медиҳанд, ки сол то сол ҳар як меъёри Қонун ба зиндагии мо роҳ ёфта, баҳри ба низом даромадани маъракаҳоямон нақши муҳим бозида истодааст.

Чи хеле огаҳ ҳастем, қабл аз қабули Қонун ва дар давраи амали он шаҳрвандон чи гуна маъракаҳои худро мегузаронданд. Дар доираи васеъ ва бо даъвати меҳмонони сершумор баргузор намудани маъракаю маросимҳо ба ҳукми анъана даромада, солиёни зиёд дар тафаккури мардуми мо чун анъана ё урфу одати ба ном бобоӣ ҷой гирифта буд, ки шикас-тани ин қолаб кори чандон саҳл набуд. Фишанг ё воситае моро зарур буд, ки ба баланд бардоштани фарҳанги маъракаороии мардуми мо таъсири мусбат расонад ва ба чунин иқдом оғоз бахшем.

Мо медонем, ки қонун уҳдадорӣ ва маҳдудиятҳоеро пешбинӣ менамояд, ки ба манфиати аксарияти ҷомеа бошад. Дар ин раванд мо бояд нозукбинона ба ин масъала рӯй оварем. Яке аз масъалаҳои умдае, ки ҷомеаи инсонӣ аз қадим баҳри беҳтар кардани шароити зиндагӣ ва таъмини адолати иҷтимоӣ матраҳ мекардааст, ин гирифтани пеши роҳи ҳар гуна исрофкорист.

Аз қабули Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» даҳ сол сипарӣ шуд ва он дар ҳаёти иҷтимоӣ ва иқтисодии ҷомеаи навини Тоҷикистон таҳаввулоти ҷиддиро ба вуҷуд оварда, ҷиҳати баланд бардоштани дараҷаи некӯаҳволии шаҳрвандони кишвар ва паст намудани сатҳи камбизоатӣ нақши муассир гузошт.

Мардуми кишварамон дарк намуданд, ки ҳангомаву таассубкорӣ дар таҷлили ҷашну тӯй ва маросимҳои азодорӣ ба ҳодисаҳои зиёди номатлуб оварда мерасонданд. Аз чаҳорчӯбаву доираи тарзи гузаронидани анъанаву расмҳои миллӣ берун баромадани аксарияти аҳолӣ ба қабули ногузиру таъхирнопазири Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» оварда расонд.

Аз ҷумла то қабули Қонун барои баргузории як тӯйи домодию арӯсӣ 11 ҳазору 785 сомонӣ, барои хатнасур 2 ҳазору 706 сомонӣ ва дафну азодорӣ 13 ҳазору 344 сомонӣ сарф мешуд, ин хароҷот ба ҳолати имрӯза барои гузаронидани тӯйи домодию арӯсӣ 4 ҳазору 200 сомонӣ, хатнасур 1 ҳазору 500 сомонӣ ва дафну азодорӣ 2 ҳазору 805 сомониро ташкил медиҳад.

Д. Гулмаҳмадзода: «Қонун ба рӯзгори мардум беҳбудӣ овард»

Дар 10 соли то қабули Қонун ҳароҷоти маъракаҳо 5 милиарду 773 миллиону 233 ҳазор сомониро ташкил дода бошад, дар давраи даҳ соли амали Қонун ин рақам ба 3 миллиарду 898 миллиону 884 ҳазор сомонӣ расид.

Баргузории ҷашну маъракаҳо ба низоми муайян даромада, теъдоди онҳо дар давоми сол ҳисобӣ гардида, сарфаю сариштакорӣ ба ҳукми анъана ва аз байн бурдани маросимҳои хурофотӣ ва маъракаҳои зиёдатӣ ба расмият даромад.

Дар натиҷа давоми 10 соли амали Қонун тибқи ҳисоботи омории мақомоти ваколатдор, ба маблағи 1 миллиарду 271 миллиону 746 ҳазору 854 сомонӣ хароҷотҳои зиёдатӣ кам гардидааст.

Гарчанде ки ин падидаҳо дар даҳ соли амали Қонун то андозае кам гардида бошанд ҳам, бурдани корҳои фаҳмондадиҳӣ ва таблиғотӣ аз аҳамият холӣ нестанд. Албатта, шахсони оқил ва дурандеш зарару оқибатҳои ин гуна амалҳои ношоистаро хуб дарк кардаанд ва маъракаю маросимҳои худро дар чаҳорчӯбаи талаботи Қонун мегузаронанд.

Бо мақсади дар амал татбиқ намудани Қонун дар шаҳру ноҳияҳои вилоят бо фарогирии аҳолии деҳот мунтазам мулоқоту вохӯриҳо доир карда, муҳтавои Қонун мавриди баррасӣ қарор дода, тавассути васоити ахбори омма барнома ва мақолаҳо пешкаш ва чоп карда шуданд.

Махсусан, дар шабакаҳои телевизионӣ таҳти унвони “Танзим-баракати зиндагӣ”, “Сайқали хирад”, “Иршод” ва “Амал” барномаҳо таҳия гардида, ҳамзамон дар рӯзнома ва маҷаллаҳои ҷумҳуриявӣ, вилоятӣ ва ноҳиявӣ, аз он ҷумла дар рӯзномаҳои “Ҷумҳурият”, “Садои мардум”, “Минбари халқ”, “Ҳамрози халқ”, “Минбари ҳуқуқшинос”, “Хатлон”, “Новый Хатлон”, дар маҷаллаҳои “Дин ва ҷомеа” ва “Сафо” беш аз 120 мақола чоп гардид.

Ҷиҳати дуруст ба роҳ мондани коргузорӣ, таҳияи санадҳои дахлдори меъ-ёрии ҳуқуқӣ дар самти танзими анъана ва ҷашну маросимҳо, расонидани ёрии методӣ ба масъулини соҳа дар вилоят беш аз 130 семинару машварат доир карда, 500 адад дастурҳои методӣ дастраси масъулони соҳаи танзими анъана ва ҷашну маросимҳо карда шуданд.

Боиси зикр аст, ки дар ин давра дар вилоят 49 ҳазору 459 маъракаи хатнасури хайриявӣ ва 3 ҳазору 30 ҷуфт тӯйи домодию арӯсии хайриявӣ баргузор карда шудааст, ки ин гувоҳи амалишавии қонун дар афзоиши маъракаҳо, бахусус маъракаҳои хайриявӣ мусоидат намуд.

Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” барои ба низом даровардани баргузории маъракаву маросимҳо таъсири амиқ гузошта, дар ин санади ҳуқуқӣ дарки истилоҳии ҳар як чорабинӣ шарҳ ёфта, мавқеи иҷтимоию таърихии он равшан карда, мансубияти миллӣ ва динию мазҳабии анъана ва ҷашну маросимҳо муайян гардида, аз диди илмӣ ва ҷойгоҳи таърихиашон ба гурӯҳҳо, аз ҷумла ҷашну маросимҳои миллӣ, динӣ, дунявӣ ва касбӣ ҷудо шудаанд. Ин боиси дақиқ гардидани доираи маъракаҳо ва тарзи баргузории онҳо шуда, бо ин роҳ меъёрҳои ҳар як расму ойин ба танзим дароварда шуд, ки дар вилоят аз тарафи олимону коршиносон, адибону мутахассисони соҳа ҳангоми баргузории мулоқоту вохӯриҳо мавриди баррасӣ қарор ёфтаанд...

Пас аз маърӯза вакилон аз шаҳру ноҳия-ҳои вилоят Алихон Нуралиев, Тоҷинисо Шарифова, Хайрулло Амонуллозода ва дигарон сухан намуда, бобати иҷроиши Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» андеша баён доштанд.

Раиси вилояти Хатлон, узви Маҷлиси миллии Маҷлиси Олии Ҷумҳурии Тоҷикистон Давлатшоҳ Гулмаҳмадзода, пас аз муҳокимарониҳо оид ба масъалаи мазкур таъкид дошт, ки ворид намудани тағйиру иловаҳо ба Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» саривақтӣ мебошад. Зеро солҳои сол сокинони Ҷумҳурии Тоҷикистон барои гузаронидани маъракаҳои азодорӣ, тӯю дигар чорабиниҳо мабалғҳои зиёде сарф менамуданд. Бахусус вазъият дар ин самт дар вилояти Хатлон бештар ташвишовар буд, - таъкид дошт раиси вилоят ва ироа намуд, ки хушбахтона, ворид гаштани тағйиру иловаҳо ба қонун имкон фароҳам овард, ки аҳолӣ аз харҷҳои беҳудаю миёншикан худдорӣ намуда, маблағҳои худро барои баланд бардоштани сатҳи рӯзгори хеш ва таълиму тарбияи фарзандон сарф намоянд.

Давлатшоҳ Гулмаҳмадзода зимни суханронӣ ба масъулини шаҳру ноҳияҳо, аз ҷумла кормандони бахши танзими анъана ва ҷашну маросимҳо, имомхатибони шаҳру ноҳияҳо баҳри назорат ва иҷрои ҳатмии қонуни мазкур дастуру супоришҳои қатъӣ дод.

Муовини аввали раиси вилояти Хатлон Ҳакимзода Қурбон доир ба масъалаи сеюми рӯзномаи иҷлосия рафти иҷрои қарори раиси вилояти Хатлон аз 2 ноябри соли 2012, №263 оид ба Қарори Ҳукумати Ҷумҳурии Тоҷикистон аз 31 августи соли 2012, №450 «Дар бораи Барномаи давлатии азхудкунии заминҳои нави обёришаванда ва барқарорсозии заминҳои аз гардиши кишоварзӣ берунмонда дар Ҷумҳурии Тоҷикистон барои солҳои 2012-2020 ва беҳтар намудани ҳолати мелиоративии заминҳои кишоварзӣ дар шаҳру ноҳияҳои вилоят ҳисобот дод.

Тавре ки зикр гардид, комиссияи доимии Маҷлиси вакилони халқи вилояти Хатлон оид ба масъалаҳои аграрӣ, беҳдошти замин ва обёрӣ, идораи замин, ҷангал, ҳифзи муҳити зист, раёсатҳо ва шуъбаҳои кишоварзӣ, идораҳои мақомоти иҷроияи ҳокимияти давлатии вилоят, ташкилоту муассисаҳои марбута, маҷлисҳои вакилони халқ ва мақомотҳои иҷроияи ҳокимияти давлатии шаҳру ноҳияҳо ва ҷамоатҳои шаҳраку деҳот барои иҷрои Барномаи мазкур тадбирҳои судмандро амалӣ намуданд.

Аз ин ҷост, ки ҳолати мелиоративии заминҳои корами обӣ дар ҳудуди вилоят беҳ гардидааст. Аз оғози барнома, яъне соли 2012-ум 4124,0 гектар заминҳо бо сабаби норасоии об барои обёрӣ аз гардиши кишоварзӣ берун монда буданд. Дар нати-ҷаи андешидани чораҳои фаврӣ, ташкили дурусти кор масъалаи мазкур роҳи ҳалли хешро ёфт. Дар ин давра тавассути муассисаи давлатии “Лоиҳаи идоракунии захираҳои оби водии Фарғона” дар ноҳияҳои Ёвон, Хуросон, Қубодиён, Шаҳритуз, Панҷ, Ҷ. Балхӣ, Ҳамадонӣ, Восеъ, Кӯлоб ва Данғара каналу ҷӯйбор, заҳбуру заҳкашҳо тоза карда, иншоотҳои обрасон пурра таъмиру барқарор карда шуданд,-таъкид рафт дар ҷамъомад.
Ҳамчунин, тариқи ин лоиҳа як қатор пойгоҳҳои обкашӣ, аз ҷумла, “Файзободқалъа-1”, “Бойтуддашт-О”, “Оқҷар-1”, “Ёвон-1” ва “Ёвон-17” барқарор карда шуданд. Тавре ки муовини раиси вилоят Ҳакимзода Қурбон таъкид дошт, тавассути лоиҳаҳои сармоягузорӣ хусусан аз ҷониби ширкати “Ҷунтай Хатлон Син-силу” дар силсила пойгоҳҳои обкашии Гаравтӣ №1 то №5 24 адад дастгоҳҳои обкашӣ васлу насб карда шуданд. Ҳамин тариқ аз давраи қабули Барнома 3969 гектар заминҳо, ки аз гардиши кишоварзӣ берун монда буданд, мавриди истифода қарор гирифтанд. Чуноне ки нотиқ баён дошт, дар ноҳияҳои Данғара, Вахш, Ҷайҳун, Ховалинг, Норак ва Ёвон дар ин самт корҳо муташаккилона ба роҳ монда, заминҳои аз гардиши кишоварзӣ берун мондаро пурра ба гардиши кишоварзӣ ворид намуданд. Дар ин давра дар сатҳи вилоят 5372 гектар, аз он ҷумла, заминҳои корами обӣ 3486,6 гектар ба гардиши кишоварзӣ баргардонида шуд,- қайд гардид дар иҷлосия.

Иҷрокунандаи вазифаи сардори Раёсати андози вилояти Хатлон Нурзода Ҷумахон доир ба иҷрои талаботҳои Кодекси андози Ҷумҳурии Тоҷикистон гузориш дод. Тавре ки номбурда таъкид дошт, дар натиҷаи амалӣ намудани талаботи Кодекси андози Ҷумҳурии Тоҷикистон иҷрои нақшаи андозҳо дар соли 2016 ба маблағи 815,8 миллион сомонӣ ва дар ҳашт моҳи соли ҷорӣ ба маблагғи 604 миллион сомонӣ таъмин гардида, нисбати соли 2015 ба маблағи 68 миллион сомонӣ ва ҳамин давраи соли 2016 ба маблағи 4,6 миллион сомонӣ зиёд аст. Дар ин давраи соли 2017 аз тарафи мақомотҳои андози вилоят 875 адад қарор оид ба маҷбуран ситонидани андозҳо ба маблағи умумии 77 миллион сомонӣ ба тасвиб расида, аз ин ҳисоб ба буҷа 31, 4 миллион сомонӣ ворид гардид.

Сипас дар иҷлосия масъалаҳои ҷорӣ, аз ҷумла тасдиқ намудани нақшаи генералии маркази ноҳияи Носири Хусрав, ворид намудани тағйиру иловаҳо ба қарори Маҷлиси вакилони халқи вилоят аз 12 марти соли 2015, масъалаҳои кадрӣ ва номгузорӣ мавриди баррасии вакилон қарор гирифт. Бо ҳамин Иҷлосияи ёздаҳуми Маҷлиси вакилони халқи вилояти Хатлон, даъвати панҷум ба кори хеш анҷом бахшид.

ВАХШОНА,
“Хатлон”



Шарҳи хонандагон +

Матолиби дигар:

Манфиати мардум дар мадди аввал аст

Манфиати мардум дар мадди аввал аст

Хабарҳо, КОМРОНИ БАХТИЁР
Ба диққати вакилони Маҷлиси вакилони халқи вилояти Хатлон

Ба диққати вакилони Маҷлиси вакилони халқи вилояти Хатлон

Хабарҳо, Ҳокимияти давлатӣ
Танзим - кафолати зиндагии шоиста

Танзим - кафолати зиндагии шоиста

Хабарҳо, Ҳокимияти давлатӣ, Фарҳанг ва адабиёт, КОМРОНИ БАХТИЁР
Қонуни танзим аз исроф пешгирӣ ва шахсони камбизоатро дастгирӣ кард

Қонуни танзим аз исроф пешгирӣ ва шахсони камбизоатро дастгирӣ кард

Хабарҳо, Ҳокимияти давлатӣ, Ҳаёти иҷтимоӣ
3 млрд. сомонӣ сарфа шуд

3 млрд. сомонӣ сарфа шуд

Ҳаёти иҷтимоӣ, Хабарҳо, ҲАНГОМА ПАҲЛАВОНОВА