Дар як сатр
» » Саидбегим – зане муваффақ дар адрасбофӣ

Саидбегим – зане муваффақ дар адрасбофӣ

10-07-2017, 08:13

Тибқи дастуру ҳидоятҳои Пешвои миллат Эмомалӣ Раҳмон, имрӯз занону духтарон дар саросари кишвар ба эҳёи ҳунарҳои миллӣ рӯ овардаанд. Аз ҷумла, дар ноҳияи Хуросон ба масъалаи эҳё ва рушди ҳунарҳои миллӣ, адрасу атласбофӣ, дӯзандагию сӯзанидӯзӣ ва кашидадӯзӣ эътибори хоса зоҳир мегардад. Дар Пешвои миллат дар яке аз Паёмҳои худ ба Маҷлис Олӣ ба зарурати дастгирии занон ва ҳунаромӯзии онҳо таъкид карданд. Зеро иқдоми мазкур яке аз роҳҳои ташкили ҷойҳои нави корӣ, афзоиши даромади шаҳрвандон ва беҳтар гардонидани вазъи молиявии онҳо ва бо ҳамин роҳ таъмин намудани фазои орому осудаи оилаҳо мебошад.
Беҳуда нагуфтаанд, ки: «Ҳунар чашмаест зоянда ва давлатест поянда». Занеро, ки дар борааш сухан мегӯем, соҳиби ҳамин гуна давлат аст.


Саидбегим Исломова - адрасбоф аз ХуросонСаидбегим Исломова - адрасбоф аз Хуросон

Саидбегим, зани соҳибкоре аз ноҳияи Хуросон, то замони реҳлати шавҳар ва ятим мондани чаҳор фарзандаш аз бурду бохти зиндагӣ бехабар буд, зеро ҳамсараш намегузошт дар рӯзгори якҷоя танқисие дошта бошанд. Ҳарчанд хатмкардаи омӯзишгоҳи касбӣ-техникии №80-и ноҳияи Хуросон буд, аммо ҳамсараш мехост, ки бештар ба таълиму тарбияи фарзандон машғул бошад.

Ниятҳои ин оилаи хушбахт нотамом монд. Шавҳари ҳамдарду ҳамдилаш ӯро тарк кард. Баъди марги шавҳар Саидбегим барои таъмини оила ва донишандӯзии фарзандонаш маҷбур шуд, ки роҳи дурустеро интихоб намояд, то фарзандонаш соҳибкасбу соҳибҳунар шаванд. Саидбегим даврони кӯдакӣ назди модари чирадасташ нишаста, барои худ ва хоҳаронаш бо ҳавас курта медӯхт.

Бо ёди ҳамон рӯзҳо Саидбегим дубора барои азхудкунии ин касб ба омӯзишгоҳи касбии техникии ноҳияи Абдураҳмони Ҷомӣ ҳуҷҷат супурд. Дар ин омӯзишгоҳ Саидбегим дар баробари дӯхтани куртаҳои занона, тарзи бофтани адрасро низ аз худ кард. Саидбегим Исломова адрасбофиро аз сидқи дил омӯхт, то ин ки соҳиби ҷойи кори доимӣ шавад ва дар дили мизоҷонаш ҷо ёбад. Ҳамин тавр ҳам шуд. Беҳуда нагуфтаанд:

Ба ҳар коре, ки ҳиммат баста гардад,
Агар хоре бувад, гулдаста гардад.


Дар як мудати кутоҳ ӯ ҳардуро ба хубӣ аз худ кард. Ин зани соҳибҳунар имрӯзҳо дар маркази таълимии ноҳия кору фаъолият намуда, ба ҳайси муаллима ба шогирдон ҳунари хонагӣ - адрасбофиро меомӯзонад. Шогирдони ӯ аллакай ин касбро аз худ кардаанд. Саидбегим дар тӯли фаъолияти хеш дар чандин озмунҳои вилоятӣ ва ноҳиявӣ иштирок намуда, сазовори ҷойҳои намоён ва якчанд ифтихорнома гардидааст. Соли 2016 бо дастгирии роҳбарияти ноҳияи Хуросон Саидбегим ҳамчун зани муваффақи соҳибкор ба дарёфти Гранти президентӣ ноил гардид. Ӯ аллакай дастгоҳи адрасбофии худро дорад ва шогирдони соҳибҳунарашро бо кор таъмин кардааст.

Ба гуфтаи ӯ, аввалин адрасҳое, ки бо шогирдонаш бофтаанд, дар арафаи иди Наврӯз духтарони коргоҳ ба тан кардаанд. Маҳсули дасти адрасбофони ин коргоҳ аллакай ба фурӯш бароварда шудааст. Саидбегим нияту нақшаҳои зиёд дорад. Мехоҳад шумораи дастгоҳҳои ӯ зиёд шаванд ва адраси бофтааш беҳтарин матоъ интихоб шавад.

Мо ба ин модари мушфиқ ва зани муваффақу кордон, ки фарзандонашро бо кӯшишу талоши хеш соҳибмаълумот намудааст ва духтараш давомдиҳандаи касби ӯст, барору муваффақият мехоҳем.

Маликабону БОБОЕВА,
Дилбар АБДУЛҲАҚОВА,
коромӯзони «Хатлон»



Шарҳи хонандагон +

Матолиби дигар:

Таъмини 12 зани хонашин бо ҷойи кор

Таъмини 12 зани хонашин бо ҷойи кор

Хабарҳо, Ҳаёти иҷтимоӣ, НОСИРҶОН МАЪМУРЗОДА
Навгониҳо дар «Гулвард»

Навгониҳо дар «Гулвард»

Хабарҳо, Иқтисоду тиҷорат, ИСМАТУЛЛО ҲАСАНОВ
Ҷуфти ҳамдилу ҳамандеш

Ҷуфти ҳамдилу ҳамандеш

Хабарҳо, Чеҳранигорӣ, Мусоҳибаи мо, ҲАНГОМА ПАҲЛАВОНОВА
Р. Раҳимзода: «Ба як зан 100 ҳунар камаст»

Р. Раҳимзода: «Ба як зан 100 ҳунар камаст»

Хабарҳо, Мусоҳибаи мо, Чеҳранигорӣ, ҲАНГОМА ПАҲЛАВОНОВА
Шаш нақши муҳими зан

Шаш нақши муҳими зан

Хабарҳо, Фарҳанг ва адабиёт