Дар як сатр
» » Асоси ҳамаи хушбахтиву бунёдкориҳо сулҳу ваҳдат аст

Асоси ҳамаи хушбахтиву бунёдкориҳо сулҳу ваҳдат аст

27-06-2017, 10:43

Асоси ҳамаи хушбахтиву бунёдкориҳо сулҳу ваҳдат аст

Табрикоти раиси вилояти Хатлон Давлатшоҳ Гулмаҳмадзода ба муносибати 20-солагии Рӯзи Ваҳдати миллӣ

Ҳамдиёрони азиз!


Бист сол аст, ки мардуми шарифи Тоҷикистони соҳибистиқлоли мо дар фазои орому осуда ва дӯстиву ҳамбастагӣ кору зиндагӣ дошта, барои ҳифзу таҳкими истиқлолияти комили кишвар ва густариши ваҳдати миллӣ ҷаҳду талош доранд.

Инсоният дар тӯли ҳаёт ба бисёр нобаробарию нокомиҳо дучор гардида, бо такя ба ақли солиму хиради олӣ тавонист хусумату бадбинӣ, кинаву адоват ва носозгориву ноҷӯриҳоро аз байн бибарад, дасти оштиву мусолиҳаро ба ҳам диҳад.

Таърихи инсоният аз замони мавҷудият то ба имрӯз он қадар ҷангу муноқиша, кашмакашию низоъҳои миллию мазҳабӣ ва иҷтимоию иқтисодиро аз сар гузаронид, ки наметавон онро дар рӯзгори имрӯзу фардо фаромӯш сохт. Сабақи таърих моро ҳушдор месозад, ки ба хотири роҳ надодан ба низову ҷангҳои бемаънӣ, ки, аслан, аз манфиатҷӯию ҷоҳталабӣ ва аз худхоҳӣ сарчашма мегиранд, ҳар яки моро водор месозад, дарки масъулиятшиносӣ дошта, аз пайомадҳои нохушу фоҷиабори он бохабар бошем.

Халқи тоҷик аз қадимулайём бо хирад ва заковати олӣ, башардӯстиву ватанпарастӣ миёни дигар қавму миллатҳо мартабаи баланд дошт, ки дар таърихи ҳазорсола бо уламо ва удабои замон шуҳрат ёфта буд. Дучори муқовимати қувваҳои бадхоҳу ҳуҷуми аҷнабиён гардидан ва борони санги низову ҷудоиталабиро ба сари мардуми сарбаланду ватанхоҳ фурӯ рехтан, ки ҳар яке мақсади аз байн бурдан ва аз асли хеш дур андохтани миллати ориёиро дошт, натавонист рӯҳияи фарзандони баору номуси ин сарзаминро шиканад ва ё ормонҳои садсолаҳо дар хеш парваридаашро барҳам занад.
Воқеаҳои нангини соли 1992 низ бо ҳамин ниятҳои бад сар зад ва бадхоҳони миллати тоҷик тавонистанд, Тоҷикистоне, ки неъмати бебаҳо - истиқлолиятро, ки акнун ба даст оварда буд, ба гирдоби ҷангу даргириҳо кашанд.

Хушбахтона, бо шарофати сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пеши роҳи ҷанги шаҳрвандӣ гирифта шуд ва 27 июни соли 1997 Созишномаи умумии истиқрори сулҳ ва ризоияти миллӣ ба имзо расид. Миллати сарбаланди тоҷик, ки ҳам заҳри ҷанги шаҳрвандӣ ва ҳам шаҳди ваҳдати миллиро чашидааст, хуб дарк мекунад, ки барҳамзанандаи ҳамаи шодию нишот ҷанг ва асоси ҳамаи хушбахтиву бунёдкориҳо сулҳу ваҳдат аст. Аз ин рӯ, ҳар тоҷики огоҳу бофарҳанг, махсусан сокинони вилояти Хатлон, ки маркази даргириҳо он ҷо буд, бояд ҷонбозиҳои беҳамтои Президенти мамлакат, Ҷаноби Олӣ муҳтарам Эмомалӣ Раҳмонро, ки дар мамлакат сулҳу амният барқарор кард, қадр кунанд.

Ифтихор аз он мекунем, ки мардуми тоҷик дар таърихи тӯлонии худ давраҳои бисёр сахту сангинро сипарӣ намуда, бо фарҳанги воло, хиради азалӣ ва тадбиру таҳаммул аз ҳама гуна буҳронҳои иҷтимоӣ ва маънавӣ раҳоӣ ёфтааст. Маҳз бо шарофати фарҳангу ойинҳои таҳаммулгарои аҷдодӣ мову шумо аз гирдоби мудҳиши ҷанги шаҳрвандӣ раҳоӣ ёфта, зимни имзои санади истиқрори сулҳ ва оштии миллӣ ба ваҳдати миллӣ ва сулҳу суботи устувор ноил гардида, бо ҳамдиливу ҳусни тафоҳум бисёр мушкилоти сиёсиву иқтисодӣ ва иҷтимоиву фарҳангиро ҳаллу фасл кардем.

Фазои имрӯзаи сиёсии минтақа ва ҷаҳон моро водор месозад, ки тамоми неруҳои созандаи ҷомеаро барои ҳифзи дастовардҳои истиқлолият, таҳкими давлатдорӣ, ваҳдати миллӣ, сулҳу субот ва рушди ҳамаҷонибаи иқтисодиву иҷтимоии мамлакат равона созем. Дар ҳолате ки давлати Тоҷикистон, воқеан ҳам, ба мутахассисони соҳаи техникӣ, махсусан технологияи муосир эҳтиёҷ дорад, мувофиқи матлаб аст, аз рӯзи аввали падару модарон фарзандонро ба расму ойин ва дину мазҳаб ошно сохтанӣ мешаванд, дарк кунанд, ки тафаккури равшану озод доштани насли наврас талаботи замон аст.

Баҳри амалигардии ин ҳадафҳои неки давлату Ҳукумати Тоҷикистон моро зарур аст, ки кору пайкори созанда ва меҳнати арзандаро ба роҳ монда, ваҳдату ягонагии миллатро пойдор ва зиндагии шоистаи мардумамонро таъмин намоем.

Бо ин ниятҳои нек тамоми мардуми заҳматкаши вилоятро ба Рӯзи Ваҳдати миллӣ табрик гуфта, ба ҳама саломатӣ ва саодати рӯзгорро таманно менамоям.

Поянда бод сулҳу ваҳдат - таҳкимбахшандаи истиқлолияти давлатӣ!


Шарҳи хонандагон +

Матолиби дигар:

Ваҳдат - шоҳсутуни миллат

Ваҳдат - шоҳсутуни миллат

Хабарҳо, Номаҳои Шумо
Роҳи сулҳ - роҳи наҷоти миллат

Роҳи сулҳ - роҳи наҷоти миллат

Хабарҳо, Ҳокимияти давлатӣ, Ҳаёти иҷтимоӣ, Номаҳои Шумо
Аз гузаштагони худ сабақи ватандории воқеӣ омӯзем

Аз гузаштагони худ сабақи ватандории воқеӣ омӯзем

Хабарҳо, Ҳокимияти давлатӣ, Ҳаёти иҷтимоӣ
Фарзанди фарзонаи миллат

Фарзанди фарзонаи миллат

Сиёсат, Хабарҳо, Номаҳои Шумо
Ваҳдати миллиро чун дастоварди миллӣ пос дорем

Ваҳдати миллиро чун дастоварди миллӣ пос дорем

Сиёсат, Хабарҳо