Дар як сатр
» » М. Сафаров: “Мекӯшем, ки ягон ваҷаб замин холӣ намонад”

М. Сафаров: “Мекӯшем, ки ягон ваҷаб замин холӣ намонад”

20-06-2017, 09:53

М. Сафаров: “Мекӯшем, ки ягон ваҷаб замин холӣ намонад”

Миёни мардум боварӣ ҳаст, ки дар замини хуб кори хуб кунию оби хубаш диҳӣ, он нони хубат медиҳад. Дар воқеъ, агар инсон бо замин хуб сарукор гирад, метавонад фоидаи хубу дилхоҳе ба даст орад.

Мурод Сафаров, сокини деҳаи Меҳрободи Ҷамоати деҳоти «Гулистон»-и шаҳри Сарбанд, аз ҷумлаи он нафаронест, ки дилбастагӣ ба кори замину саҳро дошта, шуғли деҳқониро асоси фаъолияти хеш қарор додааст. Мавсуф дар як гектар замини дар ихтиёрдоштааш боғ бунёд намуда, беш аз 280 дарахти мевадиҳанда, аз ҷумла навъи дарахтони гелосу олу, зардолую шафтолу ва себу нокро шинонидаасту имрӯзҳо ин дарахтон ҳам самари хубе ба бор оварда истодаанд. Ба чашми сар дидани сарсабзию хуррамии боғи ободнамудаи Мурод Сафаров дар ҳақиқат ҳам касро ба ваҷд меорад.

Имрӯз ин деҳқони асил аз натиҷаи заҳматҳои худ қаноатманд аст, зеро аллакай меваҳои пухтарасидаи олую зардолуи боғи Мурод Сафаров дар бозорҳои шаҳри Сарбанд ва Қӯрғонтеппа ба фурӯш рафта, буҷаи оилавии ӯро ғанӣ мегардонад.

Амаки Мурод мегӯяд: «Замин барои мо, инсонҳо, воситаи беҳтарини дарёфти ризқу рӯзист. Аз ин лиҳоз, мо кӯшиш менамоем, ки ягон порчаи замин холӣ ва бекор намонад. Ҳамасола дар байни қаторҳои боғ зироату сабзавоти гуногун, ба мисли картошка, каду, ҷуворимакка, алаф барои хӯроки чорво ва дигар маҳсулоти кишоварзиро киштукор намуда, ҳосили хуб ба даст меорем».

Тозагию ободӣ, дарахтони сарсабзу хуррам, такроран кишт шудани замин, бардоштани якчанд ҳосил аз он, воқеан, далели пуртаҷрибагиву кордонии ин деҳқони асил аст. Дар баробари оне, ки маҳсули меҳнаташро ҳам ба бозор барои фурӯш мебарораду ҳам дар зиндагии оилавиаш фаровон истифода мебарад, боз барои мардуми эҳтиёҷманд хайр ҳам мекунад.

Замоне, ки мо ба боғи амаки Мурод наздик шудем, як чизро мушоҳида намудем, ки атрофи боғ ҳама боз аст, вале боғ ҳамоно ободу зебо. Чун аз амаки Мурод иллаташро пурсон шудем, дар ҷавоб гуфт: “Агар бештари мардум фикр мекунанд, ки бояд гирди боғ ё бо дарахтони махсус, ё бо хишт, ё бо чизи дигаре маҳкам карда шавад, то ин ки дигарон ба боғ надароянд, аммо ба фикри ман ин корро набояд кунем, чунки дарахтон ҳам ҷон доранду озодӣ мехоҳанд. Ба андешаи ӯ бояд деҳқоне, ки ҳадафаш хизмати мардумро кардан аст, ҳаргиз дар бораи мардум чунин фикр намекунад. Агар ҳамаамон гӯем, ки барои мардум мекунем, пас чаро кори худро аз мардум пинҳон мекунем?”, - саволомезона иброз дошт амаки Мурод.

- Дарахтони моро касе намедуздад, - идома дод амаки Мурод. - Меваҳояшро ҳам. Мардум худашон меоянд, ба қадри лозим ба онҳо медиҳем. Мо ҳам ба ҳамин мақсад атрофи боғро «муҳосира» накардем. Бигзор, ҳар нафаре, ки аз назди боғ мегузарад, агар дилаш хост, биёяду аз ин ҷой бо худ чизе барад. Бо пул хариданӣ бошад, бо пул, эҳтиёҷманд бошад, хайре аз барои савоб мекунем.

Дар баробари ин, Мурод Сафаров камӣ накарда, дар замини наздиҳавлигиаш низ бо киштукор машғул аст. Чӣ хеле ки худаш мегӯяд: «Вақте ки мо ҳосили картошкаро мегирем, пас аз он ҷуворимакка мекорем. Боз карамҳои махсус барои хӯриш ҳам аллакай ба бозор бароварда будем. Дар ҷойи он ҳам ҷуворимакка, помидор ва боз бодирингу қаланфури булғорӣ шинонидем».

Як ҳолати аҷиби дигаре диққати моро ба худ ҷалб кард, ки қуттиҳои махсуси мевагирие дар назди хонаашон доштанд. Чун ҷӯёи посухи саволи навбатӣ шудем, амаки деҳқонамон ба мо чунин гуфт: «Ин қуттиҳое, ки дорем, аз як тараф барои маҳсулотро ба бозор бурдан бошанд ҳам, аз тарафи дигар барои онҳоест, ки ба хонаи мо ба меҳмонӣ меоянд. Мо ҳар меҳмонеро, ки ба хонаамон меояд, бо як қуттӣ аз мевагиҳои боғамон ва дигар маҳсулоти доштаамон дар баробари савғотиҳои меҳмонӣ мегуселонем».

Амаки Мурод дар илова ба шуғли кишоварзӣ боз ба кори чорвопарварӣ низ машғул аст. Ҳудуди 10 сар гови зоти нави хориҷиро имрӯз парвариш мекунад. Ба хотири тавсеа бахшидан ба ин самти фаъолияти хоҷагидориаш ният дорад, ки саршумори говҳои хориҷиро барои насл гирифтану баҳтар кардани насли молҳои маҳаллӣ афзун гардонад.

Чӣ басо марди наҷибу худододест Мурод Сафаров. Амаки Мурод дар ҳақиқат марди хоксору заминист. Ба хотири моҳи мубораки Рамазон иқдоми хуберо пеш гирифтааст, дар воқеъ амаки Мурод. Худо баракати касбу корашро додааст ва бошад, ки боз бештару беҳтар диҳадаш, то дар хизмати мардум бештар аз пештар камар бубандад. Кору пайкори ин марди наҷибу дарёдил қобили таҳсину офаринҳои бепоён аст. Метавон гуфт, ки зиндагӣ ва амалҳои хайрхоҳонаи амаки Мурод дар моҳи шарифи Рамазон намунаи ибрат барои дигарон бошад.

Нуринисо ИБОДУЛЛОЕВА,
Суннатуллоҳи МИРЗО,
шаҳри Сарбанд



Шарҳи хонандагон +

Матолиби дигар:

Достони марде, ки чарогоҳро ба боғистон табдил дод

Достони марде, ки чарогоҳро ба боғистон табдил дод

Хабарҳо, Чеҳранигорӣ, Иқтисоду тиҷорат, ҲАНГОМА ПАҲЛАВОНОВА
Ҷумъагелдӣ – осебшинос, анорпарвар, пахтакор

Ҷумъагелдӣ – осебшинос, анорпарвар, пахтакор

Хабарҳо, Арсаи кишоварзӣ, Номаҳои Шумо
Ҳосили картошка як баробар афзуд

Ҳосили картошка як баробар афзуд

Арсаи кишоварзӣ, АМОН МАҲКАМОВ
Таъмини амнияти озуқаворӣ аз истифодаи самараноки замин аст

Таъмини амнияти озуқаворӣ аз истифодаи самараноки замин аст

Хабарҳо, Арсаи кишоварзӣ, АСАЛМО САФАРОВА
Умре дар хизмати мардум буд

Умре дар хизмати мардум буд

Ҳаёти иҷтимоӣ, ҒАЙБУЛЛО ҲАЛИМОВ