Дар як сатр
» » Дар гулшани зиндагӣ номи ту накуст…

Дар гулшани зиндагӣ номи ту накуст…

7-06-2017, 10:04

Дар гулшани зиндагӣ номи ту накуст…


Муаррифӣ

Шерназар Қурбонов соли 1948 дар деҳаи Раҳмонободи ноҳияи Шамсиддин Шоҳин (собиқ Шӯрообод) дар оилаи зиёӣ таваллуд шудааст. Фориғултаҳсили муассисаи таҳсилоти миёнаи умумии №30-и ноҳия мебошад. Соли 1965 мактаби миёнаро бо баҳои хубу аъло хатм намуда, худи ҳамон сол ҳуҷҷатҳояшро ба Донишгоҳи давлатии Кӯлоб ба номи Абӯабдуллоҳ Рӯдакӣ дар факултаи забонҳои хориҷӣ месупорад. Донишгоҳро бо дипломи сурх ба итмом мерасонад. Фаъолияти меҳнатиашро аз соли 1972 оғоз мекунад. Соли 1988 роҳбари муассисаи таҳсилоти миёнаи умумии №27-и ноҳия таъйин мегардад. Соли 1993 ба ҳайси раиси Ҷамоати деҳоти Чагам фаъолияташро идома дод. Аълочии маорифи Ҷумҳурии Тоҷикистон, соҳиби ифтихорномаю сипосномаҳои мақомоти иҷроияи ҳокимияти давлатии ноҳияи Шамсиддин Шоҳин буд.


Солиёни дароз сокинони деҳаи Раҳмонободи ноҳияи Шамсиддин Шоҳин аз нарасидани оби ошомиданӣ азият мекашиданд. Мардуми ин русто дар заминҳои наздиҳавлигии худ аз нарасидани об ҳеҷ чиз намекориданд. Ҳатто дар заминҳои корами худ дар як сол як маротиба кишт мекарданду бо умеди боридани борони баҳорӣ мешуданд.

Баробари фаро расидани фасли тобистон проблемаи ҷиддӣ аҳолии мавзеи дурдасти кишварро фаро мегирифт. Дар фасли гармо сокинон ба мушкилоти зиёд рӯ ба рӯ мешуданд. Дарахтон аз набудани об хушк мегаштанд, чорвои деҳа аз нарасидани об талаф меёфт.

Шумораи аҳолии ин деҳа сол то сол зиёд мегашт. Ҳамоно нарасидани об мушкилоти асосии ин деҳа гашта буд. Деҳа танҳо як чашма дошт ва зиёда аз 80 хоҷагӣ аз он истифода мебурданд, вале дар фасли тобистон оби нӯшокӣ мардумро ба пуррагӣ таъмин карда наметавонист. Сокинон барои об аз субҳ то шом, ҳатто шабҳо дар нав-бат меистоданд. Аламовараш ин буд, ки аз тарафи раиси маҳалла рӯйхат тартиб дода ҳар оила бояд дар як шабонарӯз 2 флак (бидон) об (баробар ба 160 литр) гирад. Сокинони маҳалла намедонистанд, ки ин миқдор обро барои нӯшидан, шустӯшӯй намудан ё ба заминҳои корам истифода баранд. Сокинон бошанд, обро бештар барои ошомидан сарф мекарданд. Баъзан вақт хонандагони мактаб барои кашонидани об аз саҳар то шом машғул мешуданд. Пас, дар чунин ҳолат, аз хастагии зиёд чӣ гуна метавон шабона дарс тайёр кард? Сокинони маҳалла аз саҳар то шом навбатпоӣ мекарданд. Ҳатто шабона дар лаби чашма хоб мекарданд, то мардум шабона об набаранд.

Ҳамаи ин мушкилоти мардумро дида Ш. Қурбонов дилтанг мешуд. Фикру хаёлаш ҳамоно ба халқ буд. ӯ азм намуд, ки бо кадом роҳе набошад мардумро аз ин азоб раҳонад. Барои ҳалли ин мушкилот Шерназар Қурбонов барномае тарҳрезӣ намуда, дари даҳҳо идораву ташкилотҳои давлатию ғайридавлатиро кӯфт, то ба дарди мардум марҳаме ёбад. Хушбахтона, баъд аз кӯшишҳои зиёди Шерназар Қурбонов, бо дастгирии Хазинаи Оғохон ва маблағгузории Сафоратхонаи Олмон дар Ҷумҳурии Тоҷикистон, мардуми деҳа, аз хурд то бузург, ба таври ҳашар, ҷӯйбор кофта, қубур хобониданд ва аз масофаи 7 километр ба деҳа оби нӯшокӣ оварда шуд.

Ҳарчанд, имрӯзҳо дар миёни сокинони ин русто Қурбонов Шерназар нест, вале номи ӯ ҳамоно вирди забони аҳли деҳа аст. Ҳар нафаре, ки лаби чашма меравад, аз корнамоиҳои ӯ қисса мекунад. Мегӯянд, ки ҳамин марди дилогоҳу хайрхоҳ мушкилоташонро осон намуд. Хушбахтона, дар байни мардуми деҳа ин об бо номи «Оби Шерназар» маъруф гаштааст ва мардум ҳамарӯза аз ин об истифода бурда, дар ҳаққи Шерназар Қурбонов дуои хайр мекунанд. Ин аст ҷовидонии ҳар як фарди хайрхоҳу ватандӯст.

Шерназар Қурбонов, дар замони роҳбариаш дар Ҷамоати деҳоти Чагам, ки дар замони нобасомониҳои ҷанги шаҳрвандӣ солҳои 90-ум рост омада буд, бисёр корҳои савобро ба ҷо овардааст. Мардумро дар он айём даҳшати ҷанги шаҳрвандӣ, гуруснагию бемориҳои гуногуни сироятӣ таҳдид мекард. Мақомоти иҷроияи ҳокимияти давлатии ноҳия маҳорати ташкилотчигӣ ва меҳнатдӯстии Шерназар Қурбоновро ба назар гирифта, ӯро раиси ҷамоат интихоб намуд. ӯ аз рӯзҳои аввал дар байни мардум корҳои тарғиботӣ бурда, нагузошт ки сиёҳди-ле оромии ин мардумро халалдор созад. Дар замони ҷанги шаҳрвандӣ ба сокинони 10 деҳа кумакҳои зиёд кард. Махсусан оилаҳои ниёзмандро бо маводи ғизоӣ таъмин менамуд.

Мардум некиҳои Шерназар Қурбоновро фаромӯш накарданд ва ӯро имрӯзҳо низ ба некӣ ёд мекунанд. Ҳамаи хизматҳои нек номи ин марди Худоро дар дилу дидаи ҳамдеҳагонаш ҷо намуд. Ҳақ бар ҷониби бузурге, ки дар васфи чунин некмардон гуфта:

Зиндаю ҷовид монд ҳар ки накӯном зист,
К-аз ақибаш зикри хайр зинда кунад номро.


Фаромӯз БОБОЕВ,
Қӯрғонтеппа-Шамсиддин Шоҳин-Қӯрғонтеппа



Шарҳи хонандагон +

Матолиби дигар:

Шаҳритуз: Аксия таҳти унвони «Ҷавонон – зидди ифротгароӣ ва терроризм»

Шаҳритуз: Аксия таҳти унвони «Ҷавонон – зидди ифротгароӣ ва терроризм»

Хабарҳо, Ҳокимияти давлатӣ, Ҷавонон ва варзиш, Номаҳои Шумо
18 нафар бо хона таъмин гаштанд

18 нафар бо хона таъмин гаштанд

Хабарҳо, Ҳаёти иҷтимоӣ, НОСИРҶОН МАЪМУРЗОДА
Сокинони Сангдара чаро  барномаҳои телевизиони тоҷикро тамошо намекунанд?

Сокинони Сангдара чаро барномаҳои телевизиони тоҷикро тамошо намекунанд?

Хабарҳо, Ҳокимияти давлатӣ, Таҳқиқи журналистӣ
Боз ба як деҳа об омад

Боз ба як деҳа об омад

Ҳаёти иҷтимоӣ, Хабарҳо, ҲАНГОМА ПАҲЛАВОНОВА
Мушкили мардуми Синҷӣ осон шуд (бо аксҳо)

Мушкили мардуми Синҷӣ осон шуд (бо аксҳо)

Ҳаёти иҷтимоӣ, Хабарҳо, ДАВЛАТБЕКИ КАРИМЗОД