Дар як сатр
» » Фархор. «Корвони маърифат» ба истиқболи ваҳдат

Фархор. «Корвони маърифат» ба истиқболи ваҳдат

1-06-2017, 15:01

Фархор. «Корвони маърифат» ба истиқболи ваҳдат

Ба истиқболи 20-умин солгарди Ваҳдати миллӣ чорабиниҳои сиёсию фарҳангӣ ва иттилоотӣ дар ҳар гӯшаву канори вилоятамон идома дорад. Ин навбат «Корвони маърифат»-ро дар ноҳияи Фархор дар рӯҳияи омодагиҳои ҳамаҷониба ба ин ҷашни миллӣ пазироӣ намуданд. Хурду бузург бо рӯҳи болидаю шоду хуррам ва зам-замаи суруди ваҳдат, ватан-модар, Тоҷикистони соҳибистиқлол ба истиқболи корвониён баромаданд. Садои дафучанг, шеъру тарона ба афлок печида, як гӯшаи таърихии ноҳияи Фархор – қалъаи Золи Зарро боз ҳам диданӣ намуда буд.

Ба қавли шоир Азизи Афзалзода:

Хоки Фархор аст пурзар ин замон,
Ҳар куҷо ояд навои булбулон.
Қалъаи Золи Зару Морони он,
Ёдгоре ҳаст, аз рафти замон.
Ҳар канораш зинати гардун бувад,
Чашмасораш чашмаи Ҷайҳун бувад.


Фархори бостонӣ таърихи ҳазорсолаҳо дошта, на ҳама гузашти таърихии Фархор ба пуррагӣ таҳқиқи хешро ёфтааст. Бостоншиносону муаррихон як қатор мавзеъҳои сукунати даврони қадимаро кашф намудаанд, ковишҳои археологии шурӯъ аз соли 1953 то 2016 гузаронидашуда саҳифаҳои таърихи нави Фархорро ғанӣ намуда, бо далелҳои дақиқ таърихи 4200 - сола доштаи ноҳияи мазкурро собит намуданд. Метавон аз ҳалқаи ду дарёи сероб Панҷ ва Сурхоб ёдовар шуд. Дар гузашта доманаи Сиёҳкӯҳ ва дарёи Сурхоб дорои боду ҳавои форам ва олами набототи гуногун, чашмаҳои нуқрафому шифобахши кӯҳӣ ва олами вуҳуш буд. Аз осори бостоншиносон равшан гаштааст, ки аз бошишгоҳҳои асри сангин дар соҳили дарёи номбурда осори зиёди шикорчиёну ҳунармандон дарёфт гардидааст. Аз қадим шуғли асосии бошандагони ин мавзеъ чорводорӣ, зироаткорӣ ва ҳунармандӣ будааст.

Ёдгориҳои соҳили Сурхобу Кокул, резишгоҳи оби Тоҳир, Намозҷо, Макони мор ба аҳди Сангин далолат мекунанд. Дар даврони 26 соли соҳибистиқлолии ватанамон Фархори бостонӣ боз ҳам зебою дилрабо гардидааст. Садҳо корхонаи саноатӣ, дӯзандагӣ, биноҳои ҳозиразамони соҳаи тандурустӣ ва маориф, марказҳои хизматрасонӣ, заводу фабрикаҳо қомат афрохта, ба ҳусни ноҳия ҳусни тоза зам намуд. Рӯзи сафари «Корвони маърифат» ба Ҷамоатҳои деҳоти ин ноҳия дарк намудем, ки дар воқеъ Фархори кӯҳанзамин таҳти сиёсати созандагию бунёдкории Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон боз ҳам ободу зебо гардид.

Корвони саломатии вилоят дар деҳаи Саховати Ҷамоати деҳоти «Зафар» ба аҳолӣ хизмати ройгони тиббӣ расонид. Лозим ба ёдоварист, ки соҳаи тандурустӣ низ рӯз то рӯз дар ноҳия рушд ёфта, ба аҳолӣ хизмат мерасонад. Дар ҳар қадам самараи 20-умин солгарди Ваҳдати миллиро эҳсос намудем. Даҳҳо муассисаҳои навбунёди соҳаи тиб қомат афрохта, ба аҳолӣ хизмат мерасонанд. Ҳангоми мулоқоту вохӯриҳои «Корвони маърифат» дар ноҳияи Фархор рӯшан гардид, ки дар ҳақиқат сокинони ноҳияи Фархор аз дастовардҳои 20 соли Ваҳдати миллӣ ва хизматҳои арзандаи Президенти мамлакат, Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон шукргузоранд. Аз он ифтихор доранд, ки Роҳбари оқилу доно, сиёсатмадори варзида Эмомалӣ Раҳмон чандин маротиба ба ноҳия сафар намуда, бо аҳолӣ суҳбату мулоқотҳои самимӣ оростаанд.

Зимни чорабиниҳои «Корвони маърифат» аз қабили озмунҳо байни падару модарон, ташкили аксияҳои иттилоотӣ, мусобиқаҳои варзишӣ, маҳфили оилаи беҳтарин, вохӯрию мулоқот бо мақсади боло бурдани маърифати ҳуқуқии аҳолӣ, намоишҳои театрӣ, вохӯрӣ бо адибону шоирон, иштирокчиёни Иҷлосияи 16-уми Шӯрои Олии Ҷумҳурии Тоҷикистон пиру барно ширкати фаъолона намуда, ба аъзои гурӯҳҳои кории «Корвони маърифат» ва таъсисдиҳандагони ин чорабиниҳо изҳори сипос карданд. Вохӯрии модарон бо сарбозон, ки дар дидбонгоҳи сарҳадӣ ба вуқӯъ пайваст, шавқовару пурҳаяҷон ва хотирмон буд. Модарон бо меҳр нону кулчаҳои ширмол ва хӯрокҳои миллӣ омода намуда, ба дидорбинии сарбозон рафтанд. Дар ин мулоқот муовини раиси вилоят Махфират Хидирзода ширкат дошт ва назди сарбозон сухан намуда, ба онҳо барои ҳимояи марзу буми ватан, садоқат ба ватану модар изҳори сипос намуд. Ҳамчунин дар ҳошияи чорабиниҳои «Корвони маърифат» дар толори кинотеатри марказии ноҳия мулоқоту суҳбатҳои судманд бо ширкати беш аз 600 нафар аҳолӣ доир гардид. Зимни суҳбат доир ба татбиқи қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», «Дар бораи танзими анъана ва ҷашну маросимҳо дар Ҷумҳурии Тоҷикистон», «Дар бораи озодии виҷдон ва иттиҳодияҳои динӣ» ва пешгирии ҷавонон аз шомилшавӣ ба ҳар гуна ҳизбу ҳаракатҳои ифротию террористӣ сухан рафт.

Пас аз анҷоми чорабиниҳо дар ҳудуди Ҷамоатҳои деҳоти ноҳияи Фархор ва маркази он фаъолияти гурӯҳҳои кории «Корвони маърифат» ҷамъбаст гардид. Муовини раиси вилоят Махфират Хидирзода андешаҳои хешро пиромуни чорабиниҳои доиргардида иброз намуда, ба гурӯҳҳои корӣ баҳри беҳбудии кор маслиҳатҳои муфид дода, ба роҳбарияти ноҳия ҷиҳати фаъолнокии аҳолӣ дар мулоқоту суҳбатҳо миннатдории хешро изҳор дошт. Раиси ноҳияи Фархор Вализода Сулаймон ба роҳбарияти мақомоти иҷроияи ҳокимияти давлатии вилоят баҳри ташкили чунин чорабинии фарҳангӣ, иттилоотӣ, ҳуқуқию маънавӣ изҳори сипос намуд.

ВАХШОНА,
«Хатлон»



Шарҳи хонандагон +

Матолиби дигар:

Гурўҳҳои корӣ дар ноҳияи Темурмалик

Гурўҳҳои корӣ дар ноҳияи Темурмалик

Хабарҳо, Ҳокимияти давлатӣ, Ҳаёти иҷтимоӣ, АСАЛМО САФАРОВА
«Корвони маърифат» дар Балҷувон

«Корвони маърифат» дар Балҷувон

Хабарҳо, Ҳокимияти давлатӣ, Ҳаёти иҷтимоӣ, АСАЛМО САФАРОВА
Қубодиён. Пазироӣ аз «Корвони маърифат»

Қубодиён. Пазироӣ аз «Корвони маърифат»

Хабарҳо, Ҳокимияти давлатӣ, Ҷавонон ва варзиш, ФАРОМӮЗ БОБОЕВ
«Корвони маърифат» дар ноҳияи Панҷ

«Корвони маърифат» дар ноҳияи Панҷ

Хабарҳо, Ҳокимияти давлатӣ, Ҳаёти иҷтимоӣ, Фарҳанг ва адабиёт, Ҷавонон ва варзиш
Корвони маърифат

Корвони маърифат

Хабарҳо, Ҳокимияти давлатӣ, Ҳаёти иҷтимоӣ, Фарҳанг ва адабиёт, Ҷавонон ва варзиш, НИЗОМИДДИН ИСОЕВ