Дар як сатр
» » Шиносоии Сарвазир аз корҳои таҷдиди НБО “Сарбанд”

Шиносоии Сарвазир аз корҳои таҷдиди НБО “Сарбанд”

11-05-2017, 10:26

Шиносоии Сарвазир аз корҳои таҷдиди НБО “Сарбанд”

«Вазифаи асосии Ҳукумат дар солҳои наздик ба таври устувору доимӣ таъмин намудани ҳамаи истеъмолкунандагон бо неруи барқ буда, он бо роҳи афзоиш додани ҳаҷми истеҳсол, истифодаи сарчашмаҳои алтернативии тавлиди неруи барқ, баланд бардоштани самаранокии идоракунӣ дар соҳа ва татбиқи лоиҳаҳои афзалиятноки сармоягузорӣ амалӣ карда мешавад».

(Аз Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам
Эмомалӣ РАҲМОН ба Маҷлиси Олӣ, 22 декабри соли 2016)


8 май Сарвазири Ҷумҳурии Тоҷикистон Қоҳир Расулзода бо мақсади огоҳӣ ёфтан аз ҷараёни корҳои таҷдиду навсозии агрегатҳо дар Неругоҳи барқи обии “Сарбанд” ва корхонаи калотарини саноатии ҷумҳурӣ ҶСК «Нуриҳои Осиё» ба шаҳри Сарбанд ташриф овард.

Қоҳир Расулзодаро дар ҷараёни ин сафари корӣ раиси вилояти Хатлон Давлатшоҳ Гулмаҳмадзода ва ҳайати гурӯҳи корӣ аз вазорату идораҳои дахлдори мамлакат ҳамроҳӣ намуданд.

Тавре ки аз шуъбаи иттилоотию таҳлилии дастгоҳи раиси вилоят хабар доданд, Сарвазир зимни боздид аз корҳои азнавсозӣ диққати асосиро ба саривақт ва босифат анҷом додани лоиҳаҳои пешбинишуда равона намуда, аз шарикони лоиҳаҳо - ширкати «Хэнан Чжун–Я Гурӯҳи Холдингӣ»-и Ҷумҳурии Халқии Чин ва Ҷамъияти масъулияташ маҳдуди «Синоҳайдро - Тоҷикистон Ко» хост, ки корҳои таъмиру таҷдидро бо суръату сифати баланд ба анҷом расонанд.

Қобили зикр аст, ки НБО-и «Сарбанд» яке аз зерсохторҳои силси-ланеругоҳҳои барқи обӣ дар рӯди Вахш ба ҳисоб меравад. Дар НБО-и “Сарбанд” шаш гидроагрегат бо иқтидори 35-45 мВт насб гардида, иқтидори умумии муқарраршудаи неругоҳ 240 мВт-ро ташкил медиҳад. Неругоҳи мазкур соли 1962 ба фаъолият оғоз намудааст. Давоми фаъолияти тӯлонии худ неругоҳи мазкур 50 миллиард киловат соат қувваи барқ истеҳсол кардааст.

Модернизатсияи гидроагрегати №4 аз ҷониби пудратчии генералӣ - Ширкати «Гензер» (Туркия), субподрядчӣ - ташкилоти чинии «Лулутонг» соли 2012 ба охир расид. Айни ҳол он дар ҳолати хуби корӣ қарор дорад ва бо тарзи компютерӣ идора карда мешавад. Маблағи сарфшуда барои анҷоми ин тадбир 13 миллиону 951 359 доллари амрикоиро ташкил дода, амалӣ карда шуд. То модернизатсияи гидроагрегат он бо иқтидори 35 мВт фаъолият мекард, баъди модернизатсия бо иқтидори 45 мВт кор мекунад.

Соли 2004 бо дастгириҳои бевоситаи роҳбарияти олии сиёсии Тоҷикистон як адад автотрансформатори нави сефаза бо тавоноии 250 мегаватт бо маблағи қариб 17 миллиону 700 ҳазор сомонӣ иваз карда шуд. Инчунин, дар доираи таҷдиди неругоҳ сохта ба истифода додани хатти барқии 220-киловолта байни НБО-и “Сарбанд” ва НБО-и “Сангтӯда-2” ва иваз кардани 64 адад ҳисобкунаки элект-ронии истеҳсоли Шветсия сурат гирифт.

Тавре гуфтем, иқтидори лоиҳавии НБО-и “Сарбанд” 240 мегаваттро ташкил медиҳад. Аммо азбаски дар давоми қариб шаст соли фаъолияти ин неругоҳ, ба ҷуз аз таҷдиди як агрегат, дигар ҳеҷ гуна корҳои таҷдиду азнавсозӣ анҷом дода нашудаанд, дар шароити кунунӣ иқтидорҳои дастраси он то ба 160 мегаватт коҳиш ёфтанд.

Бо сабаби аз кор мондани низоми назорат ва танзими баландшавии об солҳои 1993 - 1994 агрегати дуюм қисман зери об монда буд. Бинобар ин, соли 2013 байни Ҳукумати Тоҷикистон ва Бонки Осиёии Рушд оид ба амалӣ намудани лоиҳаи «Таҷдиди неругоҳи барқи обии «Сарбанд» Созишномаи грантӣ ба маблағи 1,1 миллиард сомонӣ ба имзо расонида шуд. Лоиҳа аз ду марҳила иборат буда, муҳлати амалишавии он 3 сол ба нақша гирифта шудааст.

Моҳи ноябри соли 2016 Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар чаҳорчӯбаи боздиди корӣ аз шаҳри Сарбанд ба фаъолияти Неругоҳи барқи обии Сарбанд ва ҷараёни татбиқи Лоиҳаи барқарорсозии таҷҳизоти истеҳсолии энергияи барқ ошноӣ пайдо карданд. Президенти мамлакат Эмомалӣ Раҳмон аснои шиносоӣ бо кори иншоот ва ҷараёни татбиқи лоиҳа ба масъулони соҳа дастур дода буданд, ки тадбирҳои барқарорсозӣ дар ин неругоҳ ба таври матлуб ба роҳ монда шавад.

Ҳоло дар Неругоҳи барқи обии «Сарбанд» 160 нафар бо кор таъмин буда, он ба таври муътадил фаъолият мекунад.

Шиносоии Сарвазир аз корҳои таҷдиди НБО “Сарбанд”

Мувофиқи пешгӯии мутахассисон, дар натиҷаи татбиқи лоиҳа иқтидори неругоҳ ба 252 мегаватт бардошта мешавад, яъне қариб 100 мегаватт иқтидори иловагӣ ба вуҷуд омада, сатҳи хизматрасонӣ дар неругоҳ, инчунин таъминоти аҳолӣ ва соҳаҳои иқтисодиёт бо неруи барқ ба таври назаррас беҳтар хоҳад гардид.

Н. МАЪМУРЗОДА,
“Хатлон”



Шарҳи хонандагон +

Матолиби дигар:

Сарфакорӣ дар истифодаи неруи  барқ

Сарфакорӣ дар истифодаи неруи барқ

Хабарҳо, Номаҳои Шумо
Саҳлангорӣ дар корҳои роҳсозӣ

Саҳлангорӣ дар корҳои роҳсозӣ

Хабарҳо, Иқтисоду тиҷорат, НОСИРҶОН МАЪМУРЗОДА
Ба истифода додани дастгоҳи тақсимкунандаи пӯшидаи элигазии-500кВ-и НБО-и Н ...

Ба истифода додани дастгоҳи тақсимкунандаи пӯшидаи элигазии-500кВ-и НБО-и Н ...

Хабарҳо, Иқтисоду тиҷорат
Шиносоии Сарвазир аз рафти корҳои сохтмони қитъаи Ваҳдат-Ёвони роҳи оҳани Д ...

Шиносоии Сарвазир аз рафти корҳои сохтмони қитъаи Ваҳдат-Ёвони роҳи оҳани Д ...

Иқтисоду тиҷорат, Хабарҳо, НОСИРҶОН МАЪМУРЗОДА
Балҷувон. Бунёди 9 нерӯгоҳи хурд дар Сари Хосор

Балҷувон. Бунёди 9 нерӯгоҳи хурд дар Сари Хосор

Ҳаёти иҷтимоӣ, Хабарҳо, НОСИРҶОН МАЪМУРЗОДА