Дар як сатр
» » Қубодиён. Пазироӣ аз «Корвони маърифат»

Қубодиён. Пазироӣ аз «Корвони маърифат»

13-04-2017, 16:00

Қубодиён. Пазироӣ аз «Корвони маърифат»


Бо мақсади боло бурдани ҳисси ватандӯстӣ ва сулҳу ваҳдатхоҳии сокинон бахшида ба таҷлили ҷашни 20-солагии Рӯзи ваҳдати миллӣ дар ҷамоатҳои деҳоти ноҳияи Қубодиён барномаҳои фарҳангиву иттилоотии «Корвони маърифат» гузаронида шуд.

Зимни баргузории чорабинии «Корвони маърифат», муовини раиси вилояти Хатлон Махфират Хидирзода, ба ҳозирин изҳор намуд, ки ҳадаф аз баргузории чорабинии маърифатӣ-иттилоотии «Корвони маърифат», пеш аз ҳама, мусоидат намудан ба маълумотнокии бештари мардум аст. Имрӯз масъулини шуъбаи идеологӣ сафарбар шудаанд, ки ҳарчи бештар масъалаи дастрасӣ ба иттилоотро дар миёни ҷомеа зиёдтар намоянд.

Дар Ҷамоати деҳоти «20-солагии Истиқлол»-и ноҳияи Қубодиён мулоқот бо 250 нафар сокинони деҳот оид ба татбиқи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ва Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» баргузор гардид. Ҳамчунин, оид ба пешгирии амалҳои номатлуб, шомилшавии ҷавонон ба ҳар гуна ҳизбу ҳаракатҳои мазҳабӣ, ворид гаштани ҷавонон ба гурӯҳҳои террористиву эстремистӣ ва оқибатҳои ногувори он ба ҷавонон маълумот дода шуд.

Қубодиён. Пазироӣ аз «Корвони маърифат»

Раёсати кор бо занон ва оилаи мақомоти иҷроияи ҳокимияти давлатии вилоят дар Қасри фарҳанги ноҳияи Қубодиён маҳфили «Оилаи беҳтарин» доир намуд. Муовини раиси вилоят Махфират Хидирзода ба ин маҳфил ҳусни ифтитоҳ бахшида, зикр намуд, ки маҳфили «Оилаи беҳтарин» дар самти боло бурдани маърифати оиладорӣ, тарбияи дурусти фарзандон, таъмини пойдории оилаҳо, баланд бардоштани нақш ва мақоми оилаҳо дар ҷомеа аҳамияти бузург дорад. Маҳфили «Оилаи беҳтарин» аз қисматҳои намоиши таомҳои миллӣ ва ба маърази тамошо гузоштани ҳунарҳои мардумӣ, аз қабили қолинбофӣ, бофандагӣ иборат буд. Дар маҳфил панҷ оилаи намунавӣ даъват шуда буданд, ки аз зиндагии панҷсола то 45-солаи хеш баҳри оилаҳои ҷавон қиссаҳо карданд. Дар толор зиёда аз 350 адад маводҳои иттилоотию таблиғотӣ ба иштирокдорон пешниҳод намуданд.

Дар идома, Раёсати ҷавонон, варзиш ва сайёҳии вилоят дар маркази ноҳияи Қубодиён аксияи иттилоотӣ баргузор намуд. Дар аксия аз тарафи Раёсати ҷавонон ба сокинони ноҳия 1800 нусха варақаҳои иттилоотию таблиғотӣ оид ба ҷашни Ваҳдати миллӣ, баҳри тарғиби Паёми навбатии Президенти Ҷумҳурии Тоҷикистон тақсим карда шуд. Ҳамчунин, дар майдони марказии ноҳия мусобиқаҳои гуногуни варзишӣ доир гардид ва ба варзишгарони ноҳия туҳфаҳо супорида шуд.

Боиси зикр аст, ки дар ҳайати «Корвони маърифат» кормандони Раёсати тандурустии вилоят таҳти унвони «Корвони саломатӣ» дар беморхонаи №1-и Ҷамоати деҳоти «Тахти сангин» ба 720 нафар аҳолии ноҳия хизмати тиббӣ расониданд. Ҳамчунин, аз тарафи намояндагони сабти асноди ҳолати шаҳрвандии вилоят дар Ҷамоати деҳоти ба номи Носири Хусрав бо сокинон мулоқот дар бораи баланд бардоштани маърифати ҳуқуқии шаҳрандон, пешгирии барҳамхӯрии оилаҳои ҷавон ва никоҳи хешутаборӣ доир гардид. Дар чорабинӣ ба ду нафар шаҳодатномаи маросими ақди никоҳ ва ба як тифл шаҳодатномаи таваллуд тақдим карда шуд. Аз тарафи гурӯҳҳои корӣ ва бахши иттилооти «Корвони маърифат» ба сокинони ноҳияи Қубодиён зиёда аз 4050 нусха маводҳои иттилоотию таблиғотӣ тақсим карда шуд.

Қубодиён. Пазироӣ аз «Корвони маърифат»

Дар ҷамъбасти «Корвони маърифат», ки дар толори мақомоти иҷроияи ҳокимияти давлатии ноҳияи Қубодиён баргузор гардид, роҳбарони гурӯҳҳои кории «Корвони маърифат» перомуни фаъолияти гурӯҳҳо дар ҳудуди ноҳия ибрози назар намуданд. Сипас, муовини раиси вилоят Хидирзода Махфират баромад намуда, гуфт: «Дар он шаҳру ноҳияҳое, ки чорабинии «Корвони маърифат» мегузашт, ба иштироки бештари мардум дар ин чорабинӣ пайваста диққат медодем. Яъне, ҳарчӣ бештар иштироки васеи мардум дар чорабинӣ таъмин бошад. Дар ин самт, фикр мекунам, ки имрӯз мо дар ноҳияи Қубодиён ба мақсад расидем».

Фаромӯз БОБОЕВ,
Қӯрғонтеппа-Қубодиён-Қӯрғонтеппа



Шарҳи хонандагон +

Матолиби дигар:

«Корвони маърифат» дар ноҳияи Панҷ

«Корвони маърифат» дар ноҳияи Панҷ

Хабарҳо, Ҳокимияти давлатӣ, Ҳаёти иҷтимоӣ, Фарҳанг ва адабиёт, Ҷавонон ва варзиш
Корвони маърифат

Корвони маърифат

Хабарҳо, Ҳокимияти давлатӣ, Ҳаёти иҷтимоӣ, Фарҳанг ва адабиёт, Ҷавонон ва варзиш, НИЗОМИДДИН ИСОЕВ
«Корвони маърифат» дар меҳмонии сокинони Сарбанд

«Корвони маърифат» дар меҳмонии сокинони Сарбанд

Хабарҳо, Ҳаёти иҷтимоӣ, Арсаи кишоварзӣ, Маориф ва илм, НИЗОМИДДИН ИСОЕВ
«Корвони маърифат»- ро Вахш истиқбол гирифт

«Корвони маърифат»- ро Вахш истиқбол гирифт

Хабарҳо, Ҳокимияти давлатӣ, Фарҳанг ва адабиёт, Тандурустӣ ва экология, КОМРОНИ БАХТИЁР
«Корвони маърифат» дар Бохтар

«Корвони маърифат» дар Бохтар

Хабарҳо, Ҳокимияти давлатӣ, Ҳаёти иҷтимоӣ, КОМРОНИ БАХТИЁР