Дар як сатр
» » «Корвони маърифат» дар ноҳияи Панҷ

«Корвони маърифат» дар ноҳияи Панҷ

6-04-2017, 08:36

«Корвони маърифат» дар ноҳияи Панҷ

Ин дафъа аъзои гурӯҳҳои “Корвони маърифат” фаъолияти худро дар ноҳияи Панҷ оғоз намуданд.

Эҳсос мегардид, ки табақаи гуногуни аҳолии ноҳияи Панҷ ба қабулу истиқболи аъзои гурӯҳи “Корвони маърифат” омодагии комил дида буданд. Масъулину сокинони ноҳияи мазкур бо як тайёрии ҳаматарафа аз ин корвон пазироӣ намуданд. Дар ҳар қадам шиору навиштаҷотҳо доир ба Ваҳдати миллӣ, якпорчагии Тоҷикистони азиз ва дӯстии байни халқҳо ҳам дар маркази ноҳияи ва ҳам дар ҷамоатҳои деҳоти он ба назар мерасид. Аъзои гурӯҳҳои “Корвони маърифат” қабл аз ҳама “Корвони саломатӣ”-ро дар Ҷамоати деҳоти Намуна, деҳаи Намуна, беморхонаи №1 ташкил намуданд. Сардухтури беморхонаи марказии ноҳия Ш. Юнусов ҳозиронро ба фаъолияти беморхонаи №1 шинос намуд. Пайдост, ки табибону кормандони техникии беморхона ба маризон хизмати хуби тиббӣ мерасонанд.

Гурӯҳи дигари “Корвони маърифат” дар муассисаи таҳсилоти миёнаи умумии №3-и Ҷамоати деҳоти Меҳвар дар мавзӯи “Дар бораи масъулияти падару модар дар таълиму тарбияи фарзанд” бо мақсади пешгирии терроризм ва ифротгароӣ бо аҳолӣ суҳбат доир сохтанд. Дар Ҷамоати деҳоти Кабуд Сайфиддинов, деҳаи Комсомол суҳбати аъзоёни гурӯҳи “Корвони маърифат” бо мардум бо мақсади боло бурдани маърифати ҳуқуқии аҳолӣ сурат гирифт.

Дар Ҷамоати шаҳраки Панҷ, кӯчаи Рӯдакӣ ва Ҷамоати деҳоти ба номи Кабуд Сайфиддинов, муассисаи таълимии №18-и деҳаи Комсомол, Ҷамоати шаҳраки Панҷ, кӯчаи Рӯдакӣ ташкили аксияи иттилоотӣ ва мулоқот бо адибону шоирон ва рӯзноманигорон доир гашт. Дар ин суҳбат сармуҳаррири рӯзномаи “Ҳаёти нав”-и ноҳия Ф. Нуров ҳузур дошт. Аъзои гурӯҳи “Корвони маърифат” дар Ҷамоати деҳоти “Озодагон”-и деҳаи Турдӣ Шайх чорабиниҳои фарҳангиро ташкил намуданд. Оид ба кору борашон дар ин бобат мудири бахши фарҳанги мақомоти иҷроияи ҳокимияти давлатии ноҳия З. Давлатова маълумот дод.

«Корвони маърифат» дар ноҳияи Панҷ

Ҳамчунин дар Ҷамоати деҳоти “Озодагон”, деҳаи Сафедорон намоиши театрикунонии саҳначаҳо пешниҳоди мардум гардонида шуд. Дар Ҷамоати шаҳраки Панҷ варзишгоҳи марказии ноҳия мусобиқаи варзишӣ ва аксияи иттилоотӣ баргузор гашт. Дар он кулли варзишгарони ноҳия фаъолона ширкат гирифтанд. Дар қасри фарҳанг ҳамчунин барномаи “Маҳфили оилаи беҳтарин” барпо шуд. Гуфтан ҷоиз аст, ки дар ноҳияи Панҷ оилаҳои намунавӣ хеле зиёданд, ки намунаи ибрати дигарон аст.

Чунончӣ сокинони ноҳия Абдураҳмон Саидов бо ҳамсараш Гулзода Кенҷаева, Ҳалим Фозилов бо ҳамсараш Сабзигул Сулаймонова, Ғозиев Ҳақназар бо ҳамсараш Латифа Саидова, Ҷумъа Самиев бо ҳамсараш Ямлихо Машрабова, Файзалӣ Яров бо ҳамсараш Гулнора Тӯрақулова, Алишер Имомқулов бо ҳамсараш Орзугул Кенҷаева аз 6 то 12 фарзандро тарбия намуда, ба воя расониданд, ки бисёрашон дорои маълумоти олӣ буда дар соҳаҳои гуногуни хоҷагии халқи вилоят ба фаъолият машғуланд.

«Корвони маърифат» дар ноҳияи Панҷ

Сипас, дар толори мақомоти иҷроияи ҳокимияти давлатии ноҳия ҷамъомади ҷамъбастӣ доир гашт. Аъзоёни гурӯҳ хулосаҳояшонро доир ба мушоҳидаҳо аз ҷамоатҳои шаҳраку деҳоти ноҳия изҳор доштанд. Қайд гардид, ки зимни мушоҳидаҳо аён шуд, ки маркази ноҳияи Панҷ ва ҷамоатҳои шаҳра-ку деҳот нисбат ба чанд соли пеш ҳам дар хусуси иқтисодиёту иҷтимоиёт ва ҳам ободонӣ қадамҳои устувор ба пеш гузоштааст. Дар охир муовини раиси вилоят М. Хидирзода зимни суханрониаш аз он изҳори қаноатмандӣ намуд, ки сафари аъзоёни гурӯҳи “Корвони маърифат” ҳамагонро водор месозад, ки минбаъд низ дар роҳи ободонию гулгулшукуфоии Ватанамон беҳтару бештар заҳмат бикашем.

З. ХУДОЙДОДОВА,
«Хатлон»



Шарҳи хонандагон +

Матолиби дигар:

Корвони маърифат

Корвони маърифат

Хабарҳо, Ҳокимияти давлатӣ, Ҳаёти иҷтимоӣ, Фарҳанг ва адабиёт, Ҷавонон ва варзиш, НИЗОМИДДИН ИСОЕВ
Пазироии хуш аз «Корвони маърифат»

Пазироии хуш аз «Корвони маърифат»

Хабарҳо, Ҳокимияти давлатӣ, Ҳаёти иҷтимоӣ, Ҷавонон ва варзиш, АСАЛМО САФАРОВА
«Корвони маърифат» дар меҳмонии сокинони Сарбанд

«Корвони маърифат» дар меҳмонии сокинони Сарбанд

Хабарҳо, Ҳаёти иҷтимоӣ, Арсаи кишоварзӣ, Маориф ва илм, НИЗОМИДДИН ИСОЕВ
«Корвони маърифат»- ро Вахш истиқбол гирифт

«Корвони маърифат»- ро Вахш истиқбол гирифт

Хабарҳо, Ҳокимияти давлатӣ, Фарҳанг ва адабиёт, Тандурустӣ ва экология, КОМРОНИ БАХТИЁР
«Корвони маърифат» дар Бохтар

«Корвони маърифат» дар Бохтар

Хабарҳо, Ҳокимияти давлатӣ, Ҳаёти иҷтимоӣ, КОМРОНИ БАХТИЁР