Дар як сатр
» » Кумак ба муҳоҷирони бозгаштаи бекор...

Кумак ба муҳоҷирони бозгаштаи бекор...

5-04-2017, 10:14

Кумак ба муҳоҷирони бозгаштаи  бекор...

Ҷорӣ шудани таҳримҳои кишварҳои Аврупою Амрико алайҳи Федератсияи Русия тайи чанд соли охир ин кишварро ба буҳрони молӣ оварда расонд. Қурби рубл башиддат поин рафта, маоши муҳоҷирони меҳнатӣ низ чанд маротиб дар қиёс бо доллари амрикоӣ паст гардид. Дар натиҷа, ҳаҷми маблағҳои истеъмолӣ ва пардохтии оилаҳои муҳоҷирони тоҷик низ коҳиш ёфтанд. Илова бар ин, қонуни нави муҳоҷирати Русия расман аз моҳи январи соли ҷорӣ ба иҷро даромад, ки феълан дигар муҳоҷирони мавсимии тоҷик ба манзури сарфаҷӯии молӣ аз дарёфти иҷозатномаи кор фирор мекунанд. Маъмулан, ин ҳолат сабаб мешавад, ки муҳоҷирон бо риоя накардани қавонини маъмурӣ ва бемасъулиятии ҳуқуқӣ ба иштибоҳот роҳ дода, охиран “депорт” мешаванд.

Бо қабули қонуни нав дар ФР, билохира теъдоди бештари муҳоҷирон ба ватан баргашта, бар замми ин, сафи муҳоҷирони қаблан бозгаштаро зиёдтар сохт. Инак, вазъи мазкур теъдоди бекоронро дар кишвар ба маротиб боло хоҳад бурд.

Мушоҳидаҳо нишон медиҳанд, ки ҷурми бекориву сатҳи пасти иқтисодӣ баъзе афродро маҷбур сохт, то тарки ватани хеш намуда, рӯ ба кишварҳои дигар ниҳоданд. Ба ин васила, бархе аз нофаҳмӣ ва гумроҳӣ ба ҷангҳои Сурия ҷалб шуда, аксарият пойбанди афкору қавонини “Давлати исломӣ” гашта, сарнавишти хешро бо қатлу куштор ва силоҳи оташфишон марбут медонанд.

Тоҷикистон ҳам ба ҳайси як кишвари ҷомеаи ҷаҳонӣ, аз таҳдидҳои терорризм ва фишорҳои навини радикализм дар канор нест, зеро зиёдшавии теъдоди нафарони гумроҳ ба гурӯҳҳои ифротӣ, бахусус аз ҳисоби аҳолии ноҳияҳои дурдаст тавассути ҷалбшавии пинҳонӣ зоҳир гардида, тадриҷан дар тағйир додани тафаккуру эътиқоди мардуми осебпазир зери ниқоби афзалиятҳои динӣ мушоҳида мешавад.

Ҳанӯз моҳи майи соли 2014 ба Кодекси ҷиноятии Тоҷикистон банди махсусе ворид карда шуд, ки он барои ширкат дар ҷангҳои хориҷӣ аз 12 то 20 соли маҳрумият аз озодиро пешбинӣ мекунад. Мақомоти Тоҷикистон ҳамзамон барои онҳое, ки ихтиёран аз Сурияву Ироқ бармегарданд, одилона афви гуноҳ пешниҳод намуд, вале теъдоди гурӯҳҳои барнагашта, дур аз ватан ба сиёсати пешгирифтаи Ҳукумату давлати Тоҷикистон, ки дар заминаи ҳуқуқӣ, дунявӣ ва демократӣ рӯ ба инкишоф ниҳодааст, халали ҷиддӣ ворид карда, дар интишори афкори радикалӣ миёни мардум таъсири манфӣ хоҳад гузошт.

Ҷилавгирӣ аз ҳодисаҳои тундгароиро бархе ташкилотҳои ҷамъиятӣ дар баланд бардоштани сатҳи иттилоотнокии муҳоҷирони бозгашта ба ватан медонанд. Дар ин самт ташкилотҳои ҷамъиятии “Чашма” дар ноҳияи Шаҳритуз, “Ахтари бахт” дар ноҳияи Бохтар ва “Шифо” дар ноҳияи Қубодиён миёни муҳоҷирон дар ҳамкории шарикӣ бо Созмони Байналмилалии Муҳоҷират дар доираи роҳандозии лоиҳаи “Шараф ва ҳуқуқ”дар ноҳияҳои мазкури вилояти Хатлон баҳри ҳалли мушкилоти муҳоҷироне, ки вурудашон ба ҳудуди Федератсияи Россия мамнӯъ аст, дар ҷустуҷӯ ва бозёбии муҳоҷирони меҳнатие, ки ниёз ба ҷойи кору соҳибкорӣ доранд, фаъолият мебаранд.

Бино ба тадқиқоти ташкилотҳои ҷамъиятии мазкур, айни ҳол дар ноҳияҳои Шаҳритӯс, Қубодиён ва Бохтар 300 нафар муҳоҷирони меҳнатии ба ватанбаргашта аз қайд гузашта, шароити иҷтимоии хонаводаи онҳо мавриди омӯзиш қарор гирифтааст. Ҳангоми таҳлилу омӯзишҳо 40 оилаи муҳоҷирони бозгашта барои кумак интихоб шуданд: онҳо ниҳоят дар ҳоли равонию молие қарор доранд, ки ба ҳар гуна амали номатлуб осебпазиранд, аксарият расман ба муддати аз 3 то 5 сол барои воридшавӣ ба ҳудуди ФР манъ шудаанд, мушкилоти зиёди молӣ доранд, аз бонкҳо қарздор буда, тавону имконияти баргардонидани маблагҳои бонкиро надоранд. Маҳз ин хонаводаҳо барои кумаки грантӣ интихоб гардиданд.

Бино ба иттилои корманди СБМ Файзулло Наимов, лоиҳаи минтақавӣ тайи 5 сол дар Осиёи Марказӣ роҳандозӣ шуда, дар заминаи лоиҳаи қаблии мубориза алайҳи траффики инсон, ҳуқуқҳои муҳоҷирон ва муҳоҷирати меҳнатӣ татбиқ мегардад. Дар ҷараёни лоиҳаи “Шараф ва ҳуқуқ” имкониятҳои ҳалли ҳукуқвайронкунӣ нисбат ба муҳоҷирони меҳнатӣ, алайҳи савдои инсон дар минтақаи Осиёи Марказӣ, ҳамзамон, кумаки ҳадафнок ва ягонаеро дар самти устувории ҳамаҷонибаи ҳифзи ҳуқуқи инсон дар сатҳи минтақа, мавриди омӯзиш ва кумак қарор хоҳад гирифт.

Дар заминаи бозори меҳнатии дохили кишвар, аз ҳисоби муҳоҷирони бозгашта дар ҳамкорӣ бо Хадамоти шуғли аҳолии ноҳияҳои номбурда ва марказҳои омӯзиши калонсолон мутахассис бояд омода кард, зеро аксаран ҷавонони аз 20-сола болои муҳоҷирони баргашта, бо надоштани маълумот ва малакаю касб ба мушкилии бекорӣ бархӯрд доранд. Ташвишовар он аст, ки бештари муҳоҷирони бекор дар беҳтар кардани сатҳи зиндагии оилаи хеш таъсири мусбат гузошта наметавонанд. Аз ин рӯ, дар доираи лоиҳаи “Шараф ва ҳуқуқ” муҳоҷирон ба касбомӯзӣ тавассути пардохти маблағ ва гирифтани мадрак ва ё ҳуҷҷати тасдиқкунандаи таҳсилотӣ ҷалб шуда, дар таъмини ҷойҳои корӣ фарогир хоҳанд шуд. Ҳамзамон, ду намуд дастгирии молиявӣ дар шакли ду бастаи иҷтимоӣ: таҷҳизоти техникӣ барои омӯзиш, кумак барои омӯзиши маркетинги хидматрасонӣ, таъсиси гурӯҳи кории сохтмонӣ аз ҳисоби муҳоҷирони бозгашта ва мусоидат дар таҳияи нақшаҳои тиҷоративу соҳибкорӣ ба роҳ монда шудааст.

Шамъигул АМИНОВА


Шарҳи хонандагон +

Матолиби дигар:

Бо кӯмаки «Хатлон» мушкил ҳал шуд! Маошро гирифтанду идона фиристоданд

Бо кӯмаки «Хатлон» мушкил ҳал шуд! Маошро гирифтанду идона фиристоданд

Хабарҳо, Ҳуқуқу амният
Оворагии 60 муҳоҷири тоҷик

Оворагии 60 муҳоҷири тоҷик

Хабарҳо, Ҳуқуқу амният
Ихроҷи 3 муҳоҷир аз Уфаи Русия

Ихроҷи 3 муҳоҷир аз Уфаи Русия

Хабарҳо, Ҳуқуқу амният, Ҷавонон ва варзиш
«Пётри Кабир дар куҷо қаҳва нӯшидааст?»

«Пётри Кабир дар куҷо қаҳва нӯшидааст?»

Ҳаёти иҷтимоӣ, Ҷавонон ва варзиш
Тасвиби қонуни нави марбут ба муҳоҷирони корӣ дар Русия

Тасвиби қонуни нави марбут ба муҳоҷирони корӣ дар Русия

Хабарҳо