Дар як сатр
» » Қабули шаҳрвандон дар ноҳияи Панҷ

Қабули шаҳрвандон дар ноҳияи Панҷ

31-03-2017, 16:21

Қабули шаҳрвандон дар ноҳияи Панҷ

Қабули шаҳрвандон аз ҷониби раиси вилоят Давлатшоҳ Гулмаҳмадзода дар ноҳияи Панҷ доир гардид. Зимни мулоқот ва суҳбати рӯ ба рӯ сокинони ноҳия Ҳоҷиқурбон Худойназаров, Сафархӯҷа Гулов, Нуралӣ Назаралиев, Қудратшоҳ Ҳасанов, Назирмат Ҳаётов, Маҳмадёр Назриев ва дигарон доир ба масоили марбут ба таъмиру тармими пулҳо, иншооти обрасон, таъмини оби полезӣ, ҷудо кардани қитъаи замин барои бунёди бунгоҳҳои тиббӣ тибқи ҳашар, аз нав эҳё намудани фаъолияти собиқ ансамблҳои тарона ва рақси “Умед” ва “Шодӣ”, норасоии техникаи кишоварзӣ ва таъмини тухмии хушсифат ба раиси вилоят арзи матлаб намуданд.

Давлатшоҳ Гулмаҳмадзода доир ба ҳаллу фасли масъалаҳои пешниҳодгардида ба масъулини соҳаҳо дастуру супоришҳои мушаххас дод. Сипас, раиси вилоят аз масъулини соҳаҳои иқтисод, аз қабили андоз, молия, амволи ноҳияи Панҷ доир ба камбудиҳои ҷойдошта пурсон гашта, таъкид дошт, ки аз 10 намуди андоз 5 намуд иҷро нагардидааст.

- Қарзи музди меҳнат ба моҳи феврали соли равон 82 ҳазор сомониро дар бар мегирад. 5 корхонаи саноатӣ дар ноҳия фаъолият накард, - афзуд роҳбари вилоят.

Ҳамчунин Давлатшоҳ Гулмаҳмадзода доир ба вазъи соҳаи кишоварзӣ, нокифоягии ҷамъоварии ҳаққи хизмати барқ, ба талабот ҷавобгӯ набудани сатҳу сифати таълиму тарбия, ба донишгоҳҳои олӣ нисбатан кам дохил шудани хатмкардаҳои муассисаҳои таълимӣ ибрози назар карда, баҳри ҳалли саривақтии камбудиҳои ҷойдошта дастуру супоришҳои мушаххас дод.

Сипас, Давлатшоҳ Гулмаҳмадзода доир ба мазмуну муҳтавои Паёми Роҳбари давлат муҳтарам Эмомалӣ Раҳмон ва дар амал татбиқ намудани ин дастурамали ояндасози давлату миллат андеша ронда, аз ҷумла чунин зикр намуд: «Паёми роҳбари давлат бори дигар моро аз он водор сохт, ки дастовардҳои 25 соли соҳибистиқлолиро, ки ба заҳмати зиёд Президенти Ҷумҳурии Тоҷикистон ва бо мардуми шарифи ҷумҳурӣ ба даст овардааст, пеши назар биёрем ва нақшаҳои неки рушди минбаъдаи Ватани азизи хешро дар тарҳрезии Роҳбари давлат аз Паёмашон дар-ёбем».

Зимни суханронии Давлатшоҳ Гулмаҳмадзода зикр гашт, ки тайи 15 соли охир даромади буҷети давлатӣ аз 300 миллион сомонӣ то 18 миллиард сомонӣ зиёд гардида, даромади аҳолӣ 25 баробар ва пасандозҳо беш аз 85 баробар афзоиш ёфтаанд. Музди миёнаи меҳнат дар 20 соли охир 60 баробар ва андозаи миёнаи нафақа 85 баробар афзуд.

Дар ҷамъомад таъкид рафт, ки дар солҳои соҳибистиқлолӣ аз ҳамаи сарчашмаҳо, аз ҷумла аз ҳисоби лоиҳаҳои афзалиятнок барои рушди соҳаҳои энергетика, саноат, сохтмон, алоқа, инфрасохтор, маорифу тандурустӣ ва дигар бахшҳои иҷтимоӣ 88 миллиард сомонӣ равона гардид.
Дар самти таъмини истиқлолияти энергетикӣ бо маблағгузории 35 миллиард сомонӣ иншооти хурду бузурги истеҳсолу интиқоли барқ сохта шуд.

- Дар даврони истиқлолият беш аз 2000 километр роҳи мошингард, 190 километр роҳи оҳан ва зиёда аз 30 километр нақбҳои мошингузар ба маблағи умумии 11,4 миллиард сомонӣ мавриди истифода қарор гирифтанд, - таъкид дошт раиси вилоят Давлатшоҳ Гулмаҳмадзода зимни мулоқот бо фаъолону сокинони ноҳияи Панҷ. - Тибқи Барномаи рушди боғу токпарварӣ майдони боғу токзори мамлакат ба 180 ҳазор гектар расонида шуд, ки ин нисбат ба соли 1991 қариб 100 ҳазор гектар зиёд буда, дар таъмини амнияти озуқавории мамлакат, рушди содирот ва таъмини ашёи хом дар риштаи саноат заминаи судманд гузошт.

Ҳамин тавр, раиси вилоят, узви Маҷлиси миллии Маҷлиси Олии мамлакат Давлатшоҳ Гулмаҳмадзода доир ба ҳадафҳои стратегӣ, раҳоӣ аз бунбасти коммуникатсионӣ, таъмини амнияти озуқаворӣ ва истиқлолияти энергетикии мамлакат, ки зина ба зина татбиқ гардидааст, ёдовар шуда, афзуд, ки айни замон ҳадафи олии давлат ва Ҳукумати мамлакат таъмин намудани шароит барои зиндагии арзандаи сокинони кишвар ба шумор меравад. Нақшаҳои тарҳрезинамудаи Ҷаноби Олӣ моро водор месозад, ки беҳтару хубтар ба фаъолият пардозем. Дар анҷоми суханронии хеш Роҳбари вилоят иштирокдорони ҷамъомадро бо фарорасии Наврӯзи хуҷастапай таб-рик гуфта, ба онҳо барору комёбӣ ва тансиҳатӣ таманно кард.

ВАХШОНА
“Хатлон”



Шарҳи хонандагон +

Матолиби дигар:

Д. Гулмаҳмадзода: “Қарздиҳӣ аз ҷониби бонкҳо коҳиш ёфтааст”

Д. Гулмаҳмадзода: “Қарздиҳӣ аз ҷониби бонкҳо коҳиш ёфтааст”

Хабарҳо, Ҳокимияти давлатӣ, Ҳаёти иҷтимоӣ
Д. Гулмаҳмадзода: «Бо ҷалби соҳибкорон корхонаҳои саноатӣ бунёд намуда, ҷой ...

Д. Гулмаҳмадзода: «Бо ҷалби соҳибкорон корхонаҳои саноатӣ бунёд намуда, ҷой ...

Хабарҳо, Ҳокимияти давлатӣ, АСАЛМО САФАРОВА
Мулоқот бо соҳибкорон

Мулоқот бо соҳибкорон

Иқтисоду тиҷорат, Хабарҳо, АСАЛМО САФАРОВА, НИЗОМИДДИН ИСОЕВ
Рӯ ба рӯ бо мардум

Рӯ ба рӯ бо мардум

Ҳаёти иҷтимоӣ, Хабарҳо, Ҷавонон ва варзиш, Маориф ва илм, АСАЛМО САФАРОВА
Истеҳсоли маҳсулоти кишоварзӣ афзоиш ёфт

Истеҳсоли маҳсулоти кишоварзӣ афзоиш ёфт

Иқтисоду тиҷорат, Хабарҳо, Арсаи кишоварзӣ, АСАЛМО САФАРОВА