Дар як сатр
» » Дар партави Паём ва соли 2017 - «Соли ҷавонон»: «Ояндаи мамлакат аз фаъолияти омӯзгор вобастагии зиёд дорад»

Дар партави Паём ва соли 2017 - «Соли ҷавонон»: «Ояндаи мамлакат аз фаъолияти омӯзгор вобастагии зиёд дорад»

23-03-2017, 13:46

Дар партави Паём ва соли 2017 - «Соли ҷавонон»: «Ояндаи мамлакат аз фаъолияти омӯзгор вобастагии зиёд дорад»


Миллати абарқудрати тоҷик дар тӯли қарнҳои мавҷудияти хеш дар такя ба хираду дониш, сиёсати фарҳангу сулҳофарӣ тавонистааст дар сафҳаи китоби таърих бо хатти заррин исми мубораки хешро абадан сабт намояд. Сабти ном гардидани ин миллат дар сафҳаҳои китоби таърих кори басо бошарафу пурбаракате буд, ки тавассути соҳибхирадӣ ва соҳибназарии родмардони ин миллати поянда ба вуқӯъ пайваст.

Иқдоми пешгирифтаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон Эмомалӣ Раҳмон барои дастгирии ташаббусҳои бунёдкоронаи ҷавонон воқеан ҳам наҷибтарин иқдомест, ки мо, ҷавонони ноҳия, низ аз он рӯҳу равони тоза гирифта, бо як ҳисси баланди ватандӯстӣ, худогоҳиву хештаншиносӣ боз талош бар он меварзем, ки дар ободониву гулгулшукуфии ин диёру ин макон ва саодати ин мардум саҳми шоиставу арзанда дошта бошем. Хурсандиовар аст, ки Сарвари муаззами давлат дар такя ва эътимод ба ҷавонони соҳибмаърифати кишвари азизамон тавонистанд як давлати соҳибихтиёр, ҳуқуқбунёд, дунявӣ, демократӣ бунёд созанд.

Бесабаб нест, ки Пешвои миллат дар Паёми навбатӣ ба Маҷлиси Олии Ҷумҳурии Тоҷикистон, ки 22 декабри соли 2016-ум пешниҳод гардид, соли 2017-ро «Соли ҷавонон» эълон доштанд. Сарвари давлат, ки умед ба ҷавонон дорад, бо эътимоди қавию боварии том зимоми давлату давлатдориро ба дасти ҷавонон вогузоштанд, зеро муътақиданд, ки ҷавонони худогоҳ, хештаншинос, соҳибмаърифат ва тавонои тоҷик метавонанд давлати аз ин ҳам ободтару пешрафта бунёд намоянд ва дар ҷаҳони рӯ ба тараққӣ саҳми муассир дошта бошанд.

Дар мактаб, ки макони асосии тарбия маҳсуб мегардад, бояд омӯзгороне ба тадрису тарбия машғул бошанд, ки дар раванди таълиму тарбия ба хато роҳ надиҳанд ва воқеан ҳам сазовори номи мубораку шарифи муаллим, омӯзгор, устод бошанд. Зеро муаллим будан чандон кори саҳл нест ва аз ҳар он нафаре, ки мехоҳад муаллим бошад, ахлоқи шоиста ва донишу хиради бениҳоят зиёдро талаб менамояд. Муаллим бояд соҳиби дониши амиқу тарбияи солим бошад, пайваста дар ҷустуҷӯи илму дониш бошад, аз навигариҳои илми муосир, техникаву технологияи асри ҷадид воқиф бошад ва китобро дӯсти беҳтарин ва наздиктарини худ шуморад. Танҳо дар ин вақт муаллим метавонад дониши андӯхтаи хешро ба толибилмон ёд бидиҳад, онҳоро дар рӯҳияи маърифатпарвариву меҳанпарастӣ ва худшиносӣ тарбия намояд, ранҷ кашад ва аз ин ранҷ ганҷ ба даст орад. Ганҷи ноёб.

Пурарзиштарин сарват барои омӯзгорон покизагии ахлоқи шогирдону соҳибмаърифативу бофарҳангии дастпарваронаш мебошад, ки устодон аз эшон ифтихор менамоянд ва мутмаин мешаванд, ки рисолати аслии хешро ба ҷо оварда тавонистанд. Имрӯзу фардои кишвар дар дасти ҷавонон аст ва онҳо бояд воқеан ҳамчун шахсони бедорфикру покизаахлоқ ва бохираду ҳушманду зирак ба воя расанд, ки ин ба омӯзгорон бастагии зич дорад. Танҳо омӯзгор қодир аст, ки чашми басирати инсонҳоро ба олами воқеӣ, ба олами орӣ аз кулли бадиҳову кудурату разолат боз намояд. Ва танҳо муаллим қодир аст, ки раҳнамои инсонҳо бошад, ба дунёи хираду маърифат, ба ҷаҳони адлу дод, ба олами орзуву ҳавасҳо ва муродҳо. Инро Президенти муҳтарам дар як баромадаш чунин қайд намуд: «Пешаи омӯзгорӣ муқаддастарин касби рӯйи олам аст, бедории фикр, покизагии ахлоқ ва ташаккули ақлонии инсон маҳсули ранҷу машаққати омӯзгорон мебошад».

Дар ноҳияи Носири Хусрав 31 адад муассисаи таълимӣ мавҷуд буда, аз он 24 ададаш муассисаи таҳсилоти миёнаи умумӣ, 1 адад гимназия ва 5 адад муассисаи томактабӣ мебошад. Дар муассисаҳои таълимии ноҳия зиёда аз 710 нафар омӯзгорон кору фаъолият доранд, ки аз онҳо 430 нафарашон омӯзгорони ҷавон мебошанд. Аз 430 нафар омӯзгорони ҷавони муассисаҳои таълимии ноҳия 325 нафарашон занонанд.
Ин омӯзгорони ҷавон, ки ҳар як гуфтаи Пешвои муаззами давлатро сармашқи кору фаъолияти ҳаррӯзаи хеш қарор додаанд, мунтазам бар он талош доранд, ки ҷавобан ба тамоми ғамхориҳои давлату ҳукумат шогирдони дорои ахлоқи писандида ва соҳибхираду лаёқатманд ба камол расонанд ва чун беҳтарин армуғон ба давлату миллат тақдим намоянд. Беҳтарин натиҷаи заҳмати софдилонаи омӯзгорони ноҳия он аст, ки имрӯз ҷавонони ин ноҳия дар гурӯҳҳои террористӣ ва экстремистӣ шомил нестанд ва баръакс, ҷавонони соҳибхираду ҳушманди ин ноҳия чӣ аз тариқи сомонаҳои интернетӣ ва расонаҳои хабарӣ, чӣ дар ҷамъомаду ҳамоишҳо ва маҷлисҳо, ҳамсолон, дӯстон ва тамоми ҷавонони мамлакатамонро ба он даъват менамоянд, ки аз ин амали нангин, ки фарҷоми баду даҳшатангез дорад, даст кашанд, ҷони ҷавони хешро ба коми оташи ҷангу хунрезиҳо наафкананд, доғе дар номи авлоду миллат ва меҳан нагузоранд, фирефтаи макру найранги сармоядорони хориҷӣ нагарданд. Даст ба дасти ҳам дода, дар бунёди дунёи наву рангину беназиру пурасрор саҳми шоиста гузоранд ва парчамбардору ифтихори ин миллату ин Ватан бошанд. Зеро мардуми ин сарзамини файзбор ба ҷуз саодатмандиву озодандешӣ ва хирадмандиву хушбинӣ хислати дигаре надоранд.

Ин ҳам заҳмати омӯзгорони ноҳия аст, ки ҳамасола хатмкунандагони муассисаҳои таълимии ноҳия ба макотиби олии кишвар дохил мешаванд ва баъди хатми он дар ободонии ин диёри аҷдодӣ саҳми бориз доранд, ки ин боиси ифтихори аҳли маорифчиён ва мардуми ноҳия мебошад.
Бояд қайд намоям, ки Пешвои миллат, Асосгузори сулҳу ваҳдати миллӣ, Президенти Ҷумҳурии Тоҷикистон муҳтарам Эмомалӣ Раҳмон як нуқтаи хеле муҳимро дар ин росто, дар Паёми соли гузашта дарҷ намуданд: «Бори дигар таъкид менамоям, ки ояндаи мамлакат аз фаъолияти омӯзгор ва рушди илму маориф вобастагии зиёд дорад. Дар хотир бояд дошт, ки танҳо миллати босавод метавонад насли соҳибмаърифату донишманд ва кадрҳои арзандаи давронро ба воя расонад, пеш равад ва дар ҷомеаи мутамаддин мақоми арзандаи худро пайдо намояд».

Дар хусуси он ки волидон ҳам дар ин росто бояд масъулияти хеле ҷиддиро ба дӯш бигиранд, дар Паёми навбатӣ нуқоти хеле ҷолибу возеҳ баён гардидааст: «Вобаста ба ин, аз устодону омӯзгорон ва падару модарон талаб карда мешавад, ки диққати хонандагон ва наврасону донишҷӯёнро барои аз бар намудани донишҳои замони муосир ҷалб намоянд, ба сатҳи азхудкунии фанҳои дақиқ бештар таваҷҷуҳ зоҳир кунанд, забонҳои хориҷӣ ва омӯзиши технологияҳои иттилоотиву коммуникатсиониро ба роҳ монанд ва ба касбомӯзии шогирдону фарзандон эътибори ҷиддӣ дода, онҳоро дар рӯҳияи донишандӯзиву меҳнатдӯстӣ тарбия намоянд». Пас, аз ин бармеояд, ки падару модар на фақат дар тарбияи фарзандон, балки дар таълиму донишандӯзӣ ва касбу ҳунаромӯзии эшон низ масъуланд ва бояд пайваста бо мактаб робитаи зиҷу мустаҳкам дошта бошанд, барои таълими фарзандон тамоми шароити заруриро муҳайё намоянд.

Мо, омӯзгорони ҷавон, ба ояндаи дурахшони ин давлати шуҳратёру ин миллати овозадор эътимоди қавӣ дорем. Мо, ҷавонони ин сарзамини куҳанбунёд, ҳамсони аҷдодони гузаштаи хеш донишу хирад ва илму маърифатро беҳтарин ва гаронбаҳотарин сармояи зиндагӣ меҳисобем ва ҳамеша дар ҷустуҷӯи донишу аз худ намудани ҳунар ҳастем, зеро медонем, ки гузаштагони бузурги мо тавассути донишу хиради оламгирашон тавонистанд ин ватану ин миллатро побарҷо нигоҳ доранд, ҳифз намоянд ва мо низ умедворем, ки давомдиҳандагони кору пайкори аҷдодони худ бошем. Ба ҷаҳониён собит месозем, ки мо воқеан арзанда ҳастем.

Илм омӯхтану ҳунар аз худ кардан, агарчи дар ибтидо кори мушкилу вазнин ба назар намояд, вале интиҳояш роҳатбахшу дилнишин хоҳад буд. Ягона чизе, ки ҳар инсонро ба фатҳи қуллаи мурод раҳнамун месозад, ин хирад асту ҳунар ва бебаҳотарин сармояи олам низ донишу ҳунаранд, зеро: «Ҳунар чашмаи зоянда аст ва давлати поянда. Агар ҳунарманд аз давлат биафтад, боке нест, зеро худи ҳунар давлат аст. Ҳунарманд ҳар куҷо равад, қадр бинад ва дар садр нишинад ва беҳунар ҳар куҷо равад, луқма чинад ва хорӣ бинад».

Мо, ҷавонони хушбахти замони соҳибистиқлолии кишвар, мамнун аз он ҳастем, ки дар зери осмони софу беғубор умр ба сар мебарем. Шодмон аз он ҳастем, ки барои таҳсил, кор ва зиндагии мо тамоми шароити мусоид фароҳам аст. Ифтихор аз он дорем, ки Сарвари фарзонаву дурандеши миллати тоҷик ҳамеша кӯшишу талош баҳри он дорад, ки насли наврас аз илмҳои замони муосир баҳраёб гардад ва баробар бо ҷавонони мамолики пешрафтаи дунё дар бунёди ҷомеаи ҷадиду мутамаддин гомҳои устувор бардорад. Бинобар ин, Роҳбари давлат тамоми шароити мусоидро барои азхудкунии донишҳои замони муосир ва забонҳои хориҷӣ, ки дар пешрафту тараққиёти мамлакат ва зиндагии шоистаи ҳар як шаҳрванд нақши калидӣ доранд, фароҳам меорад. Дар Паёми навбатӣ дар ин хусус чунин қайд намуд: «Ҷиҳати таъмин намудани муассисаҳои таълимӣ бо омӯзгорони баландихтисос чораҷӯӣ карда, доир ба ҳалли масъалаи омӯзгорон, махсусан, аз фанҳои дақиқ ва забонҳои хориҷӣ, инчунин бо кадрҳои дорои тахсилоти олии касбӣ таъмин намудани мактабҳои деҳот, ки ин нишондиҳанда то имрӯз 70%-ро ташкил медиҳад, тадбирҳои зарурӣ андешида, то соли 2019 норасоии кадрҳои омӯзгорӣ дар мамлакат пурра бартараф карда шавад».

Мо, омӯзгорони ҷавони забонҳои хориҷии ноҳия, кӯшиш ба харҷ медиҳем, ки таълими забони англисиву русиро дар муассисаҳои таълимии ноҳия хуб ба роҳ монда, толибилмонро тавре таълим диҳем, ки донандагони хуби забонҳои хориҷӣ бошанд, ба забони хориҷӣ чун ба забони давлатӣ арҷ гузоранд, зеро омӯхтани забонҳои хориҷӣ василаест, ки метавонад ҳар миллат, ҳар шаҳрванд ва дар умум ҳар инсонро аз фақр раҳо созад, дар муҳайё намудани зиндагии шоиста мусоидат намояд. Бар замми омӯзондани забонҳои хориҷӣ дар муассисаҳои таълимӣ, мо, ҷавономӯзгорон, бар он талош дорем, ки толибилмон забони давлатиро, ки забони дилнишину ширин ва шевою гуворост, пурра аз худ намоянд, покизаву бегазанд нигоҳ доранд, то дар омӯхтани забони ғайр ба мушкилӣ рӯ ба рӯ нагарданд. Бо ин забони ноб падари шеъри форсу тоҷик устод Рӯдакӣ, Ҳофизи лисоннулғайб, устоди ғазал Саъдӣ, Мирзо Турсунзодаи мумтоз, Лоиқи ширинсухан ва ҳазорон ҳазор родмардони бузурги миллати тоҷик такаллум намудаанд ва онро беосеб ба мо - имрӯзиён ба мерос мондаанд. Мо ҳам бояд кӯшиш намоем, ки онро бегазанд ба пасояндагон ба мерос гузорем.

Сафина УСТОҚАДАМОВА,
нозири кадрҳои шуъбаи маорифи ноҳияи Носири Хусрав


Шарҳи хонандагон +

Матолиби дигар:

Ба эътимоди Пешвои миллат сазовор мемонем

Ба эътимоди Пешвои миллат сазовор мемонем

Хабарҳо, Чеҳранигорӣ, Номаҳои Шумо
Роҳнамо ва оинаи зиндагии ҷавонон

Роҳнамо ва оинаи зиндагии ҷавонон

Хабарҳо, Ҷавонон ва варзиш, Номаҳои Шумо
Суханронии Президенти кишвар дар маросими ифтитоҳи мактаби навбунёд дар ноҳ ...

Суханронии Президенти кишвар дар маросими ифтитоҳи мактаби навбунёд дар ноҳ ...

Хабарҳо, Маориф ва илм
Паёми Пешво саодати рӯзгори мост

Паёми Пешво саодати рӯзгори мост

Хабарҳо, Маориф ва илм, Номаҳои Шумо
Тақдири насли пешбарандаи давлат дар дасти омӯзгор аст

Тақдири насли пешбарандаи давлат дар дасти омӯзгор аст

Ҷавонон ва варзиш, Маориф ва илм