Дар як сатр
» » «Нақши ВАО дар таҳкими Ваҳдати миллӣ»

«Нақши ВАО дар таҳкими Ваҳдати миллӣ»

10-03-2017, 10:06

«Нақши ВАО дар таҳкими Ваҳдати миллӣ»

Дар толори Китобхонаи оммавии вилоятии ба номи Шамсиддин Шоҳин конфронси илмӣ-амалӣ таҳти унвони «Нақши ВАО дар таҳкими Ваҳдати миллӣ» барпо гардид. Ҳамоиши мазкур, ки бо ибтикори идораи рӯзномаи «Хатлон» ва дастгирии мақомоти иҷроияи ҳокимияти давлатии вилояти Хатлон доир шуд, ба 20-умин солгарди Ваҳдати миллӣ ва Рӯзи матбуоти тоҷик бахшида шуда буд. Дар кори конфронс муовини раиси вилояти Хатлон, доктори илмҳои фалсафа, профессор Хидирзода Махфират Умар, директори муассисаи давлатии Академияи ВАО-и Ҷумҳурии Тоҷикистон, ҳамзамон раиси Иттифоқи журналистони Тоҷикистон Зинатулло Исмоилзода, сармуҳаррирони расонаҳои вилоятӣ ва нашрияҳои шаҳрию ноҳиявӣ ва хабарнигорони ВАО-и маҳаллию байналмилалӣ иштирок намуданд.

Муовини раиси вилоят Махфират Хидирзода тамоми журналистонро ба муносибати Рӯзи матбуоти тоҷик таҳният гуфта, барояшон нерумандӣ, илҳоми бесарҳади эҷодӣ ва комёбӣ орзу кард. Ба таъкиди ӯ, бавижа дар шароити ҷаҳонишавӣ журналистонро мебояд муттаҳидтар шуда, ба муқобили ҳама гуна омилҳои халалдоркунандаи амнияти иттилоотӣ истодагарӣ карда тавонанд. «Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон барҳақ гуфтаанд: «муҳим нест, ки рӯзноманигорон дар кадом самт – матбуоти давлатӣ ё матбуоти мустақил фаъолият доранд. Ҳадафи асосии матбуоти ҳукуматӣ ва мустақил, ҳамчун ду шохаи бо ҳам пайвастаи матбуоти Тоҷикистон, иҷрои рисолати касбӣ, яъне хизмати содиқона ва софдилона ба манфиати халқу Ватан мебошад». Имрӯз рисолати ҳар як эҷодкор, ҳар як зиёӣ он аст, ки неруи сухан ва хомаи созандаашро барои ҳифзи арзишҳои миллию давлатдорӣ ва таҳкими сулҳу субот, ва ҳдати миллӣ ва истиқлолияти давлатӣ равона созад», - зикр намуд муовини раиси вилоят М. Хидирзода.

Зинатулло Исмоилзода, раиси ИЖТ, дар мавзӯи «ВАО-и Ҷумҳурии Тоҷикистон ва дастовардҳои замони истиқлолият» маърӯза карда, аз ҷумла қайд намуд, ки дар солҳои истиқлолияти давлатӣ журналистикаи тоҷик ба дастовардҳои қобили мулоҳиза даст ёфт. Шумораи ВАО-и расмию хусусӣ ба садҳо адад расид, ки нишонаи барҷастаи озодии баён ва таҳкими ҷомеаи мардумсолорӣ дар Тоҷикистон аст. «Алҳол замона тақозо дорад, ки рақобатпазирӣ ва амнияти итилоотии ВАО дар мадди аввал бошад. Бояд рӯзноманигорон дар маводи хеш муаммову мушкилоти мардумро инъикос намуда, раҳнамои ҷамъият бошанд. Маҳз ҳамкории муфид метавонад амнияти иттилоотиро ба вуҷуд орад», - иброз дошт З. Исмоилзода.

«Нақши ВАО дар таҳкими Ваҳдати миллӣ»

Дар идома Ҳамро Салимов, сардори идораи телевизион ва радиои вилояти Хатлон, дар мавзӯи «Саҳми ВАО-и электронии вилоят дар устувории сулҳу суботи кишвар», Шарофат Худойдодова, ноиби ректори Донишгоҳи давлатии Кӯлоб ба номи Абуабдуллоҳи Рӯдакӣ, номзади илмҳои филологӣ, дар мавзӯи «Саҳми муассисаҳои таълимӣ дар омода намудани кадрҳои журналистӣ», Дилором Маҳкамова, мудири кафедраи журналистикаи Донишгоҳи давлатии Қӯрғонтеппа ба номи Носири Хусрав, номзади илмҳои филологӣ, «Бозтоби мавзӯи сулҳу субот дар публитсистикаи китобии тоҷик», Носирҷон Маъмурзода, устоди кафедраи журналистикаи ДДҚ ба номи Носири Хусрав, дар мавзӯи «Гунаҳои инъикоси мавзӯи сулҳу ваҳдат ва масъалаҳои актуалии матбуоти даврии Хатлон» маърӯза карданд.

Дар конфронс аз ҷумла зикр гардид, ки барои беҳтар ба роҳ мондани фаъолияти ВАО-и чопии Хатлон тарбияи кадрҳои журналистие, ки сатҳи забондониашон (услуб, имло, захираи ғании луғавӣ) хуб бошад, аз такмили ихтисос гузаштани кормандони эҷодии ин нашрияҳо дар Академияи ВАО, таъсиси сомонаҳои интернетии нашрияҳо, мусоидати мақомотҳои иҷроияи маҳаллии ҳокомияти давлатӣ дар маъракаи обуна ва дастгирии молиявии нашрияҳо муҳим аст.

Сармуҳаррирони нашрияҳои «Бешкент»-и ноҳияи Носири Хусрав Рустами Сафар, «Тахти Қубод»-и Қубодиён Адолат Сайфуллоева ва «Набзи Қӯрғонтеппа»-и шаҳри Қӯрғонтеппа Усмон Билолӣ низ дар муҳокимарониҳо иштирок карда, доир ба дастоварду мушкилоти кори нашрияҳо ибрози назар намуданд.

«Нақши ВАО дар таҳкими Ваҳдати миллӣ»

Дар охир, Асалмо Сафарова, сармуҳаррири рӯзномаи «Хатлон» ва ҳамзамон раиси бахщи хатлонии ИЖТ, доир ба беҳсозии сатҳу сифати кори расонаҳои хабарии вилоят пешниҳоду тавсияҳояшро ироа карда, аз таваҷҷуҳи роҳбарияти олии мамлакат ба воситаҳои ахбори омма, қадршиносии заҳмати аҳли қалам, дастгириҳои мақомоти иҷроияи ҳокимияти давлатии вилоят аз журналистони маҳаллӣ сухан гуфт. «Ҳамон тавре ки Роҳбари давлаттаъкид доштаанд: «Ҳар як намояндаи воситаҳои ахбори омма ҳамеша дар хотир дошта бошад, ки минбари суханро бояд барои ҳифзи амнияти давлат, таҳкими пойдории ҷомеа, тарғиби худогоҳиву худшиносии миллӣ, ғояҳои ватандӯстӣ, эҳтиром ба анъанаҳои фарҳангӣ, рушду густариши забони давлатӣ истифода намояд ва ба халқу миллати худ содиқонаву беғараз хизмат карда, дар ҳимояи манфиатҳои миллӣ ва мардуми шарифи кишвар ҳаргиз бетараф набошад». Мо – журналистон сипари боэътимоди давлатем ва бояд рисолати худро ҳамчун институти муҳимми ҷомеаи шаҳрвандӣ бовиҷдонона ва ба фоидаи Тоҷикистони маҳбуб анҷом бидиҳем, - афзуд А. Сафарова.

М. НОСИРҶОН,
«Хатлон»



Шарҳи хонандагон +

Матолиби дигар:

Баррасии нақши ВАО дар таҳкими ваҳдати миллӣ

Баррасии нақши ВАО дар таҳкими ваҳдати миллӣ

Хабарҳо, Фарҳанг ва адабиёт, НОСИРҶОН МАЪМУРЗОДА
Рӯзноманигорон бо андешаи созанда дар ободкорию рушди кишвар саҳм доранд

Рӯзноманигорон бо андешаи созанда дар ободкорию рушди кишвар саҳм доранд

Хабарҳо
«Журналистикаи Хатлон: вазъият, тамоюлҳо ва дурнамои рушд» ба чоп расид

«Журналистикаи Хатлон: вазъият, тамоюлҳо ва дурнамои рушд» ба чоп расид

Хабарҳо, Маориф ва илм, КОМРОНИ БАХТИЁР
ВАО бояд аз манфиатҳои миллию давлатӣ дифоъ кунанд

ВАО бояд аз манфиатҳои миллию давлатӣ дифоъ кунанд

Фарҳанг ва адабиёт, Хабарҳо, НОСИРҶОН МАЪМУРЗОДА
ВАО сипари боэътимоди давлат аст

ВАО сипари боэътимоди давлат аст

Сиёсат