Дар як сатр
» » Дидори модару писар баъди 23 сол

Дидори модару писар баъди 23 сол

23-01-2017, 09:00


Дидори модару писар баъди 23 сол

Соли 1993. Ҷанги шаҳрвандӣ дар кишвар доман паҳн мекард. Дар он рӯзҳо совхози Туркманистони ноҳияи Вахш ба нуқтаи даргириҳои шадид табдил ёфт. Сокинон рӯ ба гурез заданд. Аҳли оилаи холаи Мавҷигул, барои ҷон ба саломат бурдан, ба ноҳияи Қубодиён паноҳ бурданд. Аммо он ҷо низ нооромӣ буд ва онҳо осудагӣ надиданд ва силоҳбадастон гаравгонашон гирифтанд. Холаи Мавҷигул Аминова, он рӯзҳои ҷудоӣ аз шавҳару писарашро ба ёд меорад ва хун мегиряду сулҳи имрӯзаро шукр мекунад:

- Гурӯҳҳои мусаллаҳ гурезагон-мардон ва занону тифлонро аз якдигар ҷудо карда, дар тагхонаҳои алоҳида нигоҳ медоштанд. Барои моро посбонӣ намудан як нафарро масъул монданд. Шабро бо бедорхобӣ рӯз кардем. Баробари дамидани субҳ «посбон» моро ба мошине савор намуда ба ҷойи дигар бурду шавҳар ва писари калониамро аз мо ҷудо карданд.

Холаи Мавҷигул афзуд, ки бо ду духтару писари хурдсолаш наҷот ёфт, аммо аз ҳоли шавҳару писараш Қурбоналӣ бехабар монд. Онҳо баъди ду моҳи оворагӣ ба хона, ба манзили зисти аввала баргаштанд. Баъдтар фаҳмид, ки шавҳарашро гурӯҳҳои мусаллаҳ ба қатл расонидаанд. Ҳамин тавр, тақдири Қурбоналии хурдсол номаълум боқӣ монд.

Дар ин муддат Қурбоналӣ ба оилаи Муслима Салимова ва Маҳмадкарим Ҷобиров, сокинони ноҳияи Ҳамадонӣ, афтодааст. Онҳо, ки азоби бефарзандӣ дош-танд, аз оилаи табори худ кӯдак гирифта, онҳоро ба фарзандӣ хонда тарбия мекарданд.

- Рӯзе, ҳодисаи тасодуф ё бо амри тақдир шахси ношиносе дар даст кӯдак ба хонаам омад: «Кӯдакро аз адир ёфтам, ҳеҷ чизе намехӯрад, мемурад», гуфт роҳгузар. Пайваста гиря мекунад, намедонам ӯро ба куҷо ё ба кӣ супорам. Ба ёд овард он рӯзҳоро Муслима Салимова. – Ҳамин тавр, кӯдакро ба фарзандӣ хондем.

Маҳмадкарим ва Муслима Қурбоналиро қатори се фарзандашон қабул карда, ба вай Ҷамшед ном гузоштанд.Ҷамшед ҳанӯз дар хурдиаш аз одамоне, ки ӯро то ноҳияи Ҳамадонӣ бурда буданд, дар куҷо будани волидони аслии худро шунидааст, яъне падараш дар қайди ҳаёт набуда, аммо модараш ҳоло дар ҳаёт аст.

- Баъди гузашти солҳо суроғ карда ба маҳалли зисти волидайн омадам. Суроғашон кардам, вале аз онҳо нишоне наёфтам. Ноумед ба ноҳияи Ҳамадонӣ баргаштам,-мегӯяд Ҷамшед.

Аз ин пас, ба холаи Мавҷигул хабар расидааст, ки дар маҳаллаи Ломоносови шаҳри Қӯрғонтеппа ҷавоне падару модарашро ҷустуҷӯ дорад. ӯ ба маҳаллаи Ломоносов меравад, вале Қурбоналӣ аллакай ба ноҳияи Ҳамадонӣ баргашта буд. Модар аз он рӯз қарор аз даст дод. Қалби модарӣ ҳис менамуд, ки он ҷавон ҷигарбандаш аст. Модар аз онҳое, ки ҷавонро мешинохтанд, ҷойи зист ва рақами телефонашро гирифта ба хона баргашт.

- Вақто ки зане телефон карда худро модари ман муаррифӣ намуд, дар аввал боварам наомад. Ба худ суол медодам: «Агар ин зан модари ман бошад, пас чаро дар ин солҳо боре ба суроғи ман наомад? Дудила будам. Зан такрор ба такрор занг мезад. Ба ӯ гуфтам, ки ҳафтаи дигар ба ноҳияи Ҳамадонӣ биёяд. Баъди фурсате дилам тоқат накарда, «пагоҳ биё, не, не, ҳамин рӯз биё», гуфтамаш. Модари аслиам ба дидори ман омад. Меҳру муҳаббат ва бӯйи модарӣ ба ман неру бахшид. Ба худ қавл додам, ки ҳар ду модарро фарзанд шуда, ба онҳо содиқона хизмат мекунам.

-Ба ноҳияи Ҳамадонӣ рафта, писарамро баркамол дарёфтам. Сад бор шукр, ташаккур ба нафаре, ки писарамро калон кардааст, - афзуд холаи Мавҷигул, модари ҳақиқии Қурбоналӣ.

Ҳамин тавр, ҷавон барои модархондаш Ҷамшед ва барои модари аслиаш Қурбоналӣ аст. Қалби бузурги модарон, ки яке ба фарзанд ҳаёт додаю дувумӣ зиндагиро бахшидааст, меҳру муҳаббати гарми худро ба Қурбоналӣ арзонӣ доштаанд…

Комрони БАХТИЁР,
«Хатлон»



Шарҳи хонандагон +

Матолиби дигар:

Зиндагии офтобии Ҷамшеду Сайёра (видео)

Зиндагии офтобии Ҷамшеду Сайёра (видео)

Хабарҳо, Ҳаёти иҷтимоӣ, Матолиби чандрасонаӣ, КОМРОНИ БАХТИЁР
Кӯдакони замони ҷанг чӣ орзу доштанд?

Кӯдакони замони ҷанг чӣ орзу доштанд?

Ҳуқуқу амният, Ҷавонон ва варзиш
Зане, ки 40 нафар гурезаро паноҳ дода буд

Зане, ки 40 нафар гурезаро паноҳ дода буд

Ҳаёти иҷтимоӣ
Нинае, ки бо лутфу забондонияш дилҳоро тасхир карда

Нинае, ки бо лутфу забондонияш дилҳоро тасхир карда

Ҳаёти иҷтимоӣ
Се доғи бузурги як дили кӯчаки модар

Се доғи бузурги як дили кӯчаки модар

Ҳаёти иҷтимоӣ, НОСИРҶОН МАЪМУРЗОДА