Дар як сатр
» » Чаро фарзанди лӯлиҳо ба мактаб намераванд?

Чаро фарзанди лӯлиҳо ба мактаб намераванд?

17-01-2017, 15:45

Чаро фарзанди лӯлиҳо ба мактаб намераванд?
Қавми ҷӯгиҳо дар ноҳияҳои Ҷалолиддини Балхӣ ва Восеъ умр ба сар мебаранд ва шаҳрвандии Тоҷикистонро соҳиб буданд ва ҳастанд. Пас, онҳо низ дар радифи дигар шаҳрвандони кишвар муваззафанд, ки қонунҳои Тоҷикистонро эътироф намуда, талаботи онҳоро бечуну чаро риоя намоянд.

Дар Ҷамоати деҳоти «Туғаланг»- и ноҳияи Ҷалолиддини Балхӣ мактаби таҳсилоти миёнаи умумии №6 ба хотири донишандӯзии лӯлиҳои деҳаҳои Ленин ва Максим Горкий сохта шудааст. Аммо имрӯзҳо фарзандони лӯлиҳои деҳаи Ленин аз 107 хоҷагӣ ҳамагӣ 50 нафар ба таълим фаро гирифта шудаасту халос. Вале қисми зиёди онҳо дар деҳаи Максим Горкий, яъне аз 165 хоҷагӣ ягон нафар ба мактаб ҷалб нашудаанд. Дар роҳраву растаҳо ба кӯдакони синну соли мактабӣ вохӯрдан мумкин аст, ки аз таълим дур монда, шояд бо ҳидояти волидонашон барои дарёфти маблағ даст ба талбандагӣ мезананд. Аксари ин кӯдакони оворагарди лӯлитабор сокини ноҳияи Ҷалолиддини Балхӣ унвон мешаванд.

Холмад Ёвонов, раиси маҳаллаи Максим Горкий чунин ибрози ақида намуд: «То соли 1991 дар ин деҳа муассисаи таълимӣ барои таҳсил муҳайё буд. Ҳоло бинои таълимӣ ба харобазор табдил ёфтааст. Масъулон ваъда дода буданд, ки дар деҳа муассисаи таълимии нав сохта медиҳанд. Аммо то ҳол бинои нав насохтаанд. Фарзандонамон бошанд баъд аз соли 1991 ба муассисаи таълимӣ барои гирифтани хатту савод нарафтанд, аз ин сабаб лӯлиёни ин деҳа аз таълиму тарбия дур мондаанд».

Ба қавли бошандагони деҳаи Максим Горкий масофаи миёни мактаб аз деҳа 500 метрро дар бар мегирад ва аз ин хотир кӯдакони худ-ро намегузоранд ба мактаб раванд ва иддао доранд, ки масъулин барои фарзандонашон мактаб бунёд кунанд.

-Барои ба таҳсил ҷалб намудани лӯлибачаҳои деҳаи Максим Горкий чандин маротиба назди волидайни онҳо рафта хоҳиш кардам, ки фарзандонашон ба мактаб раванд ва оворагардӣ накунанд. Вале волидони ин қавм ҳамеша дурии роҳро баҳона намуда, аз таҳсил саркашӣ мекунанд, - зикр намуд Мукаррама Нарзуллоева, директори мактаби №6- и деҳаи Ленини Ҷамоати деҳоти «Туғаланг»- и Ҷ. Балхӣ. - Дар ин муассиса танҳо як қисми лӯлибачаҳои деҳаи Ленин таҳсил мекунанд, саводи хуб доранд. Аксарияташон забонҳои русӣ ва англисиро медонанд. Тарбия ва рафтору кирдорашон низ қобили таҳсин аст.

Дар идомаи суҳбат номбурда қайд намуд, ки аз соли 1992 лӯлиён дар муассисаи мазкур таҳсил мекарданд, танҳо дар ин сол шаҳодатномаи хатми мактабро гирифтаанду халос. Дигар аз ҳамон сол инҷониб касе аз ин қабила шаҳодатномаи хатми мактабро нагирифтааст. Зеро синфи ҳаштро мехонанду баъдан аз хондан даст мекашанд.

Ҳангоми суҳбат бо қабилаи лӯлитаборон маълумамон гардид, ки дар даст шиносномаи тоҷикӣ доранд ва дар он миллаташон тоҷик навишта шудааст. Дар муҳоҷирати меҳнатӣ онҳоро ҳамчун тоҷик мешиносанду эътироф менамоянд. Худ қазоват намоед, нафароне, ки тамоман қадам ба сӯи муассисаи таълимӣ нагузоштаанд ва хатту саводе надоранд, магар шаъну шарафи тоҷиконро дар назди дигар миллатҳо коста намегардонанд?

- Лӯлиёне, ки дар Ҷумҳурии Тоҷикистон ба таври доимӣ истиқомат мекунанд, дар ин маврид онҳо ҳуқуқ ба таҳсил доранд. Ва мутобиқи қонунгузории Ҷумҳурии Тоҷикистон фарзандони худро бояд ба ҳамон мактабҳое, ки дар маҳали истиқоматиашон воқеъ аст, ба таҳсил фаро гирифта шаванд, - афзуд Сайфиддин Муҳиддинзода, муовини раиси Суди вилояти Хатлон. Инчунин талаботи Қонуни Ҷумҳурии Тоҷикистонро «Дар бораи масъулияти падару модар дар таълиму тарбияи фарзанд» ҳатмӣ риоя намоем ва барои рафтору кирдоре, ки аз ҷониби фарзандони онҳо содир мешавад, дар назди ҷамъияту давлат масъул бошем.

Ба ақидаи мавсуф, риояи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ва умуман, тамоми қонунҳои амалкунандаи Тоҷикистон ба ҳамаи шаҳрвандон ҳатмист. Яъне, дар ҳоле ки барои гирифтани таҳсил ба ҷӯгитаборон монеа гузошта нашудааст, онҳо низ бояд дар қатори дигар халқу миллатҳои маскуни кишвари мо дар мактаб хонанду илму дониш андӯзанд. Пас, суоли матраҳ ин аст, ки чаро волидони ҷӯгибачаҳои аз таълим дурмонда ва зиёда аз ин, машғул ба талбандагию оворагардӣ, барои риоя накардани Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ба ҷавобгарӣ кашида намешаванд?

Мақомоти иҷроияи ҳокимияти давлатии ноҳияи Ҷалолиддини Балхӣ тасмим гирифтааст, ки барои фарзандони қабилаи лӯлиҳо дар масоҳати як гектар замин мактаби замонавӣ созад. Ин иқдом шоистаи дастгирист.

Файзимад АВЛОНОВ


Шарҳи хонандагон +

Матолиби дигар:

Оғози фаъолияти мактаби №10 дар деҳаи Чашмаи шаҳри Норак бо иштироки Пешвои ...

Оғози фаъолияти мактаби №10 дар деҳаи Чашмаи шаҳри Норак бо иштироки Пешвои ...

Хабарҳо, Маориф ва илм
Чаро омӯзгор бо либоси хоси наварӯсон ба мактаб меояд?

Чаро омӯзгор бо либоси хоси наварӯсон ба мактаб меояд?

Фарҳанг ва адабиёт, Хабарҳо, Маориф ва илм, ҲАНГОМА ПАҲЛАВОНОВА
Қубодиён: Ҳоли ягона гимназияи хусусӣ табоҳ мешавад?

Қубодиён: Ҳоли ягона гимназияи хусусӣ табоҳ мешавад?

Хабарҳо, Маориф ва илм, Таҳқиқи журналистӣ, КОМРОНИ БАХТИЁР
Шӯрообод. Ифтитоҳи мактаб дар деҳаи Ҷилга

Шӯрообод. Ифтитоҳи мактаб дар деҳаи Ҷилга

Хабарҳо, Маориф ва илм, НОСИРҶОН МАЪМУРЗОДА
Ҷӯгӣ магар шаҳрванди Тоҷикистон нест?

Ҷӯгӣ магар шаҳрванди Тоҷикистон нест?

Ҳаёти иҷтимоӣ, Таҳқиқи журналистӣ, КОМРОНИ БАХТИЁР