Дар як сатр
» » Пайроҳаи ҳунарии Мастура

Пайроҳаи ҳунарии Мастура

8-09-2018, 07:16

Муҳаббат ва меҳри беандозаи шеъру сурудхонӣ, рақсу ҳунарнамоӣ ҳанӯз дар айёми кӯдакӣ дар қалби Мастура лона гузошта буд. Ҳамаи ин хоҳишу орзуву ниятҳоро як вохӯрӣ амалӣ намуд.

Тирамоҳи соли 1984 барои иҷрои хуби нақшаи пахтасупорӣ роҳбарияти ноҳияи Панҷ ҳунармандони Театри академии драмавии ба номи А. Лоҳутиро ба ноҳия даъват карданд. Ҳунармандони театр намоишномаи «Дар Чорсӯ»-и Нур Табаровро пешкаши тамошобинон гардониданд. Мастура Ортиқзода интизори омадани ҳунармандон ва тамошои намоишнома буд. Бо як меҳри беандоза ва шавқи зиёд намоишномаро, ки дар назди идораи хоҷагӣ намоиш дода шуда буд, тамошо кард. Дар намоишнома Ҳунарпешаҳои шоистаи  Тоҷикистон Ҳабибулло Абдураззоқов, Ато Муҳаммадҷонов, Бурҳон Раҷабов, Убайдулло Раҷабов, Ортиқ Қодиров, Муҳаммадҷон Шодиев ва дигарон ҳунарнамоӣ мекарданд. Баъд аз намоиш Мастура ҷуръат пайдо карда, ба назди яке аз нақшофарони намоишнома, Ҳунарпешаи халқии Тоҷикистон Ато Муҳаммадҷонов рафт. Ба устод орзуи ҳунарпеша шуданашро фаҳмонид. Устоди зиндаёд ва гавҳаршинос ӯро бо диққат гӯш дода,  ба Мастура якчанд маслиҳати муфид дода, хоҳиш кард, чун ба Душанбе ояд, ҳатман, ӯро пайдо кунад. Ниҳоят соли 1985 ӯ бо дастгирии хешу табор, махсусан амакаш Шералӣ Шарифов (ёдаш ба хайр) ва холааш Иззатмоҳ Раҳмонова ва тавсияи устод Ато Муҳаммадҷонов ба Донишкадаи давлатии фарҳанг ва санъати ба номи М.Турсунзода дохил шуд.

Мастура Ортиқзода соли 1989 баъди хатми Донишкада     дар Муассисаи давлатии «Театри давлатии академии драмавии ба номи А.Лоҳутӣ» фаъолияти эҷодии худро оғоз намуда, то имрӯз кор ва фаъолият карда истодааст. Ӯ маҳз дар саҳнаи театри мазкур як қатор нақшҳоро офаридааст. Наргис дар «Тарсу»-и Н.Табаров, модар дар «Роҳгумзада»-и Д.Убайдуллоев, Ситора дар «Афсонаҳои мӯйсафед»-и Н. Абдуллоев, Мастура дар «Драмаи миллат»-и С. Аюбӣ, Назокат дар «Сӯробҳо»-и Н. Табаров, Шарлотта дар «Дон Жуан»-и Ж.Б.Молер, Рӯбоҳ дар «Шерафган»-и Р. Қудратов, Ҳалима-хола дар намоишномаи «Куҷо равонем»-и Н. Абдуллоев, Устинова «Ҳисоби дӯстон дар дил»-и А. Островский, Смиралдина «Хизматгори ду хоҷа»-и К. Голдони, Наргис дар «Чодари найранг»-и Т. Аҳмадхонов (дар фестивал-озмуни ҷумҳуриявии театрҳои касбии "Парасту-2015” соҳиби ҷоиза гаштааст), Дилором хола дар «Бояд донем ва тавонем»-и А.Абдураҳмонов, Ҳамсари заргар дар «Қиссаи ғамгину рангин»-и Т. Аҳмадхонов аз ҷумлаи нақшаҳои офаридаи Мастура мебошад.

Мастура Ортиқзода узви Иттифоқи синамогарони Тоҷикистон мебошад. Инчунин, дар дубляжи филмҳо иштироки фаъол дорад. Коргардони видеофилмҳои «Қарзи виҷдон» ва «Фарзанди бегона»,  «Ӯ ҳақ бо забони шодӣ гӯяд»  мебошад, ки ин намоишҳои телевизионӣ аз тарафи тамошобинон ва мухлисони кинои тоҷик хеле хуб қабул шудааст.

Мастура Ортиқзода соли 2011 аз тарафи Ҳукумати Ҷумҳурии Тоҷикистон бо Ифтихорномаи Ҷумҳурии Тоҷикистон сарфароз гардонида шуд.

Ҳунарманди пуркору таҷриба-андӯхта, модари ғамхору дилсӯзи чор фарзанд, Мастура Ортиқзода ҳар боре ки ба деҳааш-ноҳияи Панҷ меояд, аз дидори наздикону пайвандонаш дар вуҷудаш сафову фараҳ лабрез мегардад. Аз меҳру шавқу завқаш болидарӯҳ гашта, шукри Яздони поку беҳамторо мекунад, ки озмоишҳои зиндагиро  бо ҳама пастиву баландӣ бартараф намуд, худ дар зиндагӣ шахсияте шуд, ки пайроҳаи тайнамудааш метавонад барои ҷавонон, махсусан духтарони маҳаллӣ намунаи ибрат бошад. Касби дӯстдоштааш, меҳру муҳаббати наздиконаш, тинҷиву осоиштагии ватани азизаш, такондиҳандаю илҳомбахш дар офаридани нақшҳои тоза ба тоза, кашфи пайраҳаҳои дигари эҷодӣ, амалӣ гардидани ҳамаи орзуву ормонҳои дар дил парваридаи Мастура Ортиқзода мебошанд.

Дар арафаи ҷашни 27-умин солгарди Истиқлолияти давлатии Ҷумҳурии Тоҷикистон дар қатори дигар кормандони маориф, илм ва фарҳанг барои хизматҳои  шоёну фаъолияти пурсамар дар соҳаи фарҳанг Мастура Ортиқзодаро бо унвони фахрии Ҳунарпешаи шоистаи Тоҷикистон қадрдонӣ намуданд. Мо ҳама ҳамкасбон ба Мастура Ортиқзода самимона мегӯем: Унвон муборак!

 

Лутфулло Давлатзода,
роҳбари Театри академии
драмавии ба номи А. Лоҳутӣ, Ҳунарпешаи халқии Тоҷикистон


Шарҳи хонандагон +

Матолиби дигар:

АМАЛИ ХАЙРИ ҲУНАРМАНДОНИ ТЕАТР

Хабарҳо
Намоишномаи «Рудолфио» баҳои баланд гирифт

Намоишномаи «Рудолфио» баҳои баланд гирифт

Фарҳанг ва адабиёт, ҲАНГОМА ПАҲЛАВОНОВА
Нигоҳе ба таърихи ташаккули театри Қўрғонтеппа

Нигоҳе ба таърихи ташаккули театри Қўрғонтеппа

Хабарҳо, Фарҳанг ва адабиёт, ҲАНГОМА ПАҲЛАВОНОВА
Театри Кӯлоб соҳибҷоиза шуд

Театри Кӯлоб соҳибҷоиза шуд

Фарҳанг ва адабиёт, Хабарҳо
«Парасту-2015» ва 100-солагии Ҳунарпешаи халқии СССР

«Парасту-2015» ва 100-солагии Ҳунарпешаи халқии СССР

Фарҳанг ва адабиёт, Хабарҳо, ҲАНГОМА ПАҲЛАВОНОВА